Batzar Nagusiak Bizkaiko sistema politikoaren erdigune ziran. Beste leku batzuetan be batzarrak egiten zirana badakigu, esaterako Aretxabalaganan, Bilbo eta Gernika arteko bidean, baina Gernikan egindako batzarren lehenengo aitamena 1308. urtekoa da. Hasierako lekukotza horreetatik ikusten da bi zirala erakundearen zereginak: batetik, bizkaitarren usadio eta ohiturak gordeteko Jaunaren zina jasotea; eta bestetik, legegintza-jarduerea.

Urteak joan ahala, gero eta dokumentazino gehiago daukagu eta hortik atara geinke Batzar Nagusiak gobernurako erakunde gorena zirala, hiru lurralde-osagai nagusitan bananduta egoala lurraldea (Bizkai gunea, Durangaldea eta Enkarterria) eta Bizkai gunearen zutabe nagusien artean (Lur Edegia eta Uribilduak) gizarte- eta lege-ezbardintasunak egozala.

Aginpideak

Batzar Nagusiek eukezan aginpideak sail nagusiotan banatu leitekez:

Legegintza-aginpideak:

Agintarauak eta araudiak egitea, euron artean Foruak idatzira ekartea.

Aginpide politikoak:

Bizkaiko Jaunak Zugaizpean egindako zinaren hartzaile izatea eta Foruak bete egiten zirala zaintzea, Foru-Baimenean zehaztutako tresnen bidez.

Administrazino-aginpideak:

Ahaldunak, errejidoreak eta beste foru-karguak hautatzea (legelariak, sindikoak, eskribauak, diruzainak...).

Ekonomia-aginpideak:

Jaurerriaren ekonomian eragina euken erabagi asko hartzen ziran.

Soldadutza:

Soldaduak bialdu aurretik Batzarrak onartu egin behar izaten eban hori.