BIZKAIKO BATZAR NAGUSIEK EZ DABE ONARTU LAS KARRERASEKO SAIHESBIDERAKO PROIEKTUAN HERRITARREK PARTE HARTZEKO PROZESUA EDEGITEA
- Azpiegituretarako eta Lurralde Garapenerako batzordeak, Euzko Abertzaleak eta Euskal Sozialistak taldeen kontrako botoagaz, ez dau onartu EH Bilduk eta Talde Berezia-Elkarrekin Bizkaia taldeak herritarrakaz akordioa bilatzeko aurkeztu daben arauz besteko proposamena.
(Bilbon, 2024ko urriaren 9an). Bizkaiko Batzar Nagusietako Azpiegituretarako eta Lurralde Garapenerako batzordeak ez dau onartu gaur “Las Karreraseko Saihesbidearen proiektuak eragindako herritarrakaz lankidetzarako akordioa” bilatzeko EH Bilduk eta Talde Berezia-Elkarrekin Bizkaia taldeek aurkeztu daben arauz besteko proposamena. Talde biek, Bizkaiko Talde Popularraren aldeko botoagaz, “herritarren parte hartze prozesua hastea eta gauzatzea” planteau dabe, “proiektua idatzi bitartean herritarren eretxiak erakundeei helarazoteko asmoz”.
Ekimen horren idea, Las Karreraseko herri plataforma bateko bozeroaleek Bizkaiko Batzar Nagusietan egindako agerraldi batetik abietan da. Agerraldi haretan saihesbidea lurperatzea eta, beraz, hilebete batzuk lehenago Aldundiak aurkeztu eban bide-alternatibea aldatzea eskatu eutsien taldeei. Foru erakundeak saihesbide bat proiektau eban –17 milioi euroko inbertsinoagaz–, Las Karreraseko herriguneko trafikoa futbol zelaiaren ingurutik bideratzeko.
Foru Gobernuari eusten deutsien taldeek osoko zuzenketa-eskea aurkeztu dabe, baina ez da onartu. Bertan, jeltzaleek eta sozialistek, une honetan egiten ari dan azterlan teknikorako eta aurrekonturako Aldundiak, jatorrizko saihesbidearen proposamenaz gain, erakunde horrek 2023an egin ebazan informazino publikoko prozesuetan jasotako “proposamenak, iradokizunak eta kexak” eta Abanto-Zierbenako Udalak egindako eskaerak kontuan hartzea planteau dabe, horreen artean, errepidearen egungo trazaua guztiz lurperatzea. Talde biek uste dabenez herritarrek badaukie nahiko bide alegazinoen epealdian parte hartzeko. Jatorrizko proiektuak “120 alegazino” jaso ebazan, eta Aldundia, une honetan, hasierako idearen beste alternatiba batzuen bila dabil.
Halanda be, proposamena aurkeztu daben taldeek azpimarratu dabenez, beharrezkoa da eragindako herritarrek “lankidetzarako prozesua” izatea, preminen ordezkagarritasuna lortzeko eta, beraz, erabagiak hartzeko orduan adostasuna izateko. Herritarren esanetan, orain arte aurkeztutako proposamenak “herria zatitu egiten dau, galera ekologikoa dakar, kaltea eragiten dau Bizkaiko gune kultural eta historiko esanguratsu batean, balio agrologiko handiko lurzorua apurtzen dau, galtzeko arriskuan dagozan espezieak arriskuan jarten ditu eta udalerrian behar dan lurzoru urbanizagarriaren aukerea mugatzen dau”.
MEGAPARK ETA APARKABISA ARTEKO PASABIDEA
Bizkaiko Batzar Nagusietako Azpiegituretarako eta Lurralde Garapenerako Batzordeak ez dau onartu, egunero Megapark merkataritza gunearen eta Aparkabisaren artean BI-744 errepidea zeharkatzen daben oinezkoen segurtasuna bermatuko dauen oinezkoentzako pasabidea eregiteko Barakaldoko eta Trapagako udalen eta Aldundiaren artean konponbidea bilatzeka eskatuz Bizkaiko Talde Popularrak aurkeztu dauen arauz besteko proposamena.
Popularren ekimenak oposizinoko beste talde bien (EH Bildu eta Talde Berezia-Elkarrekin Bizkaia) aldeko botoa jaso dau, baina ez da onartu, foru Gobernuari eusten deutsien talde biak kontra agertu diralako. Euzko Abertzaleak eta Euskal Sozialistak taldeek azpimarratu dabenez, udalek eurek jakinarazo behar deutsie hori Azpiegituretarako eta Lurralde Garapenerako Sailari. Batzar Nagusiek “ez dabe zaindu behar” oinarria udal izaerako eskumenetan dauen arazoa, azpimarratu dabenez.
AZPIEGITURAK, LEKUKO
Azpiegiturak-ek epaitegi baten aurrean agertu beharko dau 2025eko bagilaren 15ean, lekuko lez, Zierbenako familia baten kasuarengaitik. Foru soziedade horrek Zierbenako lursail batzuen salerosketagaitik dauen “978.000 euroko” zorra ordaintzeko eskatu deutso familiari, Carlos Alzaga Azpiegituretarako eta Lurralde Garapenerako diputatuak baieztu dauenez.
Talde Berezia-Elkarrekin Bizkaia taldeak agerraldi-eskea erregistrau eban Bizkaiko Batzar Nagusietan, Diputatuak Itziar Garamendi Azpiegituretako zuzendariari datorren urterako egindako zitazino judizialari buruzko azalpenak emon eizan.
Bere azalpenetan, Alzagak baieztu dau eragindako familiak, 2015. eta 2018. urteen artean, hamar urte lehenago garai haretako Bizkailur foru-soziedadeagaz etxebizitza publikora zuzendu behar ziran lursail batzuengatik sortutako 1,5 milioi euroko zorraren % 35a ordaindu ebala. Familiak notario aurrean hartu eban zor hori ordaintzeko konpromisoa, baina 2019an zatikako ordainketak geldiarazotea erabagi eban, lursailek balioa galdu ebela eretxita.
Alzagaren berbetan, lursail batzuen goranzko edo beheranzko desbideratze batek ez dau salbuesten 2012an udalari berari igon jakon zor-aitorpena ordaintzetik; izan be, lursailak salerosteko eragiketea 2005ean egin zan, eta guztira 2,9 milioi euro inguruko zenbatekoa izan eban. Familiak lurren aprobetxamendua handitzea erabagi eban, “% 4,94tik % 12,2ra”, eta horrek, ondoren, “1,5 milioi” euroko zorra eragin eban Administrazinoagaz.
Diputatuak baieztu dauenez, familiagaz lortutako akordioak 17 urteko “nahiko marjina zabala” ezarri eban betebehar hori ordaintzeko, baina 2019an familiak ordainketak geldiarazotea erabagi eban. Hori dala eta, Alzagak uste dau Aldundiak kasua epaitegietara eroatea baino“ez dauela beste aukerarik”, zor jakon kopurua kobretako, hori parkatzea “ondasun publikoak bidebakotasunez erabiltearen delitua egitea litzatekelako”.
