BIZKAIKO BATZAR NAGUSIEK HASIEREA EMON DEUTSIE FINANTZA-ENTIDADEEN INTERES ETA KOMISINOEN GANEKO FORU ARAUAREN EZTABAIDEARI

• Itxaso Berrojalbiz Zabala Ogasun eta Finantzetako diputatua batzordearen aurrera etorri da gaur, arau proiektua azaltzeko.
   
• Herritarrek urriaren 22ra arteko epea dabe Batzar Nagusien webgunean alegazinoak aurkezteko.

(Bilbon, 2026ko urriaren 16an) Bizkaiko Batzar Nagusiek, Finantza-entidadeen interes eta komisinoen marjinaren ganeko zergearen Foru Arau proiektuaren eztabaidea zabaldu dabe gaur. Ogasun eta Finantzetako batzordeak Itxaso Berrojalbiz Zabala Ogasun eta Finantzetako diputatuaren agerraldia bideratu dau gaur, zerga horren ildo nagusiak azaltzeko. 

Arau proiektua urriaren 2an erregistrau eban Aldundiak Bizkaiko Batzar Nagusietan, izapidetzeko. Arauaren barruan, kreditu-erakundeek, kredituko finantza-establezimenduek eta atzerriko kreditu-erakundeen sukursalek Espainian lortutako interesen eta komisinoen marjina (IMIC) zergapetzeko zuzeneko zerga bat sortzea aurreikusten da. Zerga horren zerga kuotea, “Soziedadeen Zergearen osagarria”, Berrojalbizen berbetan, % 1 eta % 7 arteko karga-eskalea aplikauz lortzen da, murrizketa eta kenkari jakin batzuk aplikau eta gero. Kalkuluak beteten badira, Bizkaiak 30 milioi euro jasoko ditu zerga horretatik 2026an. 

Modu berean, Foru Arauaren proiektuak Soziedadeen ganeko Zergeari, Ez Egoiliarren Errentaren ganeko Zergeari eta Balio Erantsiaren ganeko Zergeari jagokezan Kontzertu Ekonomikoaren aldaketak jasoten ditu. Aldaketa horreek Ekonomia Itunaren Batzorde Mistoaren 2024ko zemendiaren 13ko Lehenengo Akordioan dagoz jasota. Ganera, proiektuak joan dan apirilean onartutako zerga-barrikuspenaren aldaketa teknikoak jasoten ditu. 

Diputatu andrearen azalpenen eta urriaren 22an bukatuko dan alegazino aldiaren ostean, arau-proposamena egun horretan bertan izapidetuko da Bizkaiko Batzar Nagusietan, zuzenketa-eskeen epealdia edegita. Batzar Nagusietako taldeek 15 eguneko epea izango dabe zuzenketa-eskeak aurkezteko. Aurreikuspenak beteten badira, arauzko proiektuaren behin betiko testua, zuzenketa-eskeak batzordean eztabaidatu eta gero, abenduko ohiko osokoan onartuko da.