BATZAR NAGUSIETAKO LEHENDAKARIAK NAZINOARTEKO MEMORIA- ETA TURISMO-LEKUAK MINTEGIAREN EDEGIERA EKITALDIAN HARTU DAU PARTE

• Gaur eta bihar bitartean Gernikan egingo dan Nazinoarteko Bigarren Topaketea Gernikako Bakearen Museoa Fundazinoak eta Observatorio Europeo de Memorias – EUROM-ek batera antolatzen dabe, eta Bizkaiko Batzar Nagusien eta Gernika-Lumoko Udalaren laguntzea dau. 
   
• Mintegian erregistrau aurretik, parte-hartzaileek Gernikako Batzarretxea eta Bakearen Museoa bisitau ditue. 

(Gernikan, 2024ko urriaren 9an). Gernikako Bakearen Museoa Fundazinoak eta Observatorio Europeo de Memorias – EUROM-ek bi urtez behin batera antolatutako Memoria- eta turismo-lekuak Nazinoarteko Mintegia sendotu egingo da “Memoriaren erabilera turistikoak” izena daroan bigarren edizino honegaz. Gaur eta bihar artean memoriaren eta turismoaren arteko erlazinoari buruzko hausnarketea egingo da Gernikan, berbaldi, mahai eta eztabaiden bitartez. Nazinoko eta nazinoarteko ordezkariek ikerketak eta esperientziak partekatuko ditue, eta, corpus analitiko gero eta finkatuagoa dauen eta susperraldian dagoan arloari buruzko ezagutza sendotzen lagunduko dabe.

Mintegiaren hasierea gaur goizean izan da, Gernikako Batzarretxean eta Bakearen Museoan. Parte-hartzaileek bisita bi egin ahal izan ditue egoitza bi horreetara, topaketearen edegiera ekitaldira joan aurretik. Ia ordubetez, Gernikako arbolea ikusi eta Bizkaiko Batzar Nagusietako egoitzearen historia ezagutu ahal izan dabe, eta horren ostean, egitaraua abiau dabe Elai Alai Aretoan. 

Nazinoarteko topaketa horreen aurkezpenean parte hartu dabe Ana Otadui Biteri Bizkaiko Batzar Nagusietako lehendakariak, José María Gorroño Gernikako alkateak, Leire Saez Ríos Bizkaiko Foru Aldundiko Turismo zuzendariak, Iratxe Momoitio Gernikako Bakearen Museoko zuzendariak eta Jordi Guixé Bartzelonako Unibersidadeko Alkartasuna Fundazinoko Observatorio Europeo de Memorias-eko (EUROM) zuzendariak. Hasiera ofiziala Gernikako Turismo Bulegoko Begoña Arrieta Sagarnak aurkeztu dau. 

Gaur arratsaldean bertan, 18:15ean, Anne Hertzog CY Cergy-Paris Unibersidadeko irakaslea izango da Gernikako Batzarretxean “Memoria lekuaren dimentsino turistikoa: mesfidantzaren eta legitimazioaren arteko eraikuntza politiko eta soziala. Frantziako kasuetan oinarritutako hausnarketa-elementuak” izenburua dauen Konferentziaren berbaldi-markoaren protagonistea.