BIZKAIKO FORU ALDUNDIAK 56.000 EUROKO ZEHAPENAK JARRI DEUTSEEZ VTC IBILGAILUEI 2026KO LEHEN HILEBETEETAN ANTZEMANDAKO EZ-BETETEAKAITIK
- Sonia Pérez Ezquerra Garraioak, Mugikortasuna eta Turismoa Sustatzeko foru diputatuak sektorerako ezarri dan hileroko kontrol plan espezifiko barria zehaztu dau Batzar Nagusien aurrean, Talde Berezia-Elkarrekin Bizkaia taldeak agerraldia eskatu eta gero.
- Aldundiko arduradunak, Parte-hartze Publikoaren prozesuari hasierea emoten deutson Bizkaiko Ibilbide Berdeen Lurralde Plan Sektorialaren (Bideberdeak) aurrerapenerako dokumentua aurreratu deutse Batzar Nagusietako taldeei.
(Bilbon, 2026ko martiaren 11n). Bizkaiko Foru Aldundiak 56.000 euroko zehapenak jarri deutseez gidaridun garraio-ibilgailuei (VTC) 2026ko ikuskapen-plan barria aplikau dan lehenengo hiruhilekoan. Kopuru hori hileko ikuskapen espezifikoen egutegia lehenengoz ezartearen emaitzea da. Egutegi horren helburua baimen horreek uri-zerbitzuak emoteko ez dirala modu irregularrean erabilten egiaztetea da. Jardunbide hori beren beregi debeketan dau indarrean dagoan araudiak, eta Estaduaren eskumena da horren garapena. Bizkaian 161 VTC lizentzia eta 1.249 taxi dagoz.
Sonia Pérez Ezquerra Garraioak, Mugikortasuna eta Turismoa Sustatzeko foru diputatuak aurkeztu ditu datu horreek Bizkaiko Batzar Nagusietako jagokon batzordean egin dauen agerraldian, eta, bertan, ikuskaritzako jarduerea “iraunkorra, bizia eta gero eta eraginkorragoa” dala azpimarratu dau. Zehaztu dauenez, ikuskapen sistemak hamar profesionaleko taldea dauka (zazpi ikuskapen laguntzaile eta hiru teknikari), eta 2025eko azkenengo ekitaldian (urtarriletik zemendira bitartean) 1,16 milioi eurotik gorako zehapenak gainditu dituan eskubide ekonomikoak lortu ditu garraioaren sektore osoan. Kopuru horretan, personen, salgaien, taxien eta VTCen garraioa barne hartzen dauen ikuskapen-lan handia sartzen da.
Garraioak, Mugikortasuna eta Turismoa Sustatzeko batzordearen aurreko agerraldia Eneritz de Madariaga Martín Talde Berezia-Elkarrekin Bizkaia taldeko bozeroaleak eskatuta egin dau diputatuak. Talde horretako bozeroaleak taxien sektorearen kezkea azaldu dau, UPTA Euskadi alkarteak igazko zemendiaren 28an Foru parlamentuko batzorde batean azaldutako kexa dokumentauen ostean. Saio haretan, taxien sektoreko ordezkariek “lehia desleialeko” egoerea salatu eben, Uber eta Cabify lako plataformek ez ebelako araudia beteten, baimenik bako uri-zerbitzuak egitea, derrigorrezko bereizgarririk ez izatea eta ibilgailuak legez kanpo errotuletea lako arau-hausteak nabarmenduz, Loiuko aireportuan emoten diran beste ez-betete batzuez gain. De Madariaga Martínek eskaria egin deutso Foru Aldundiari, zainketea indartu daian, taxiaren iraunkortasun ekonomikoan eragin negatiboa izan ez daian. Modu berean, zalantzan jarri dau gaur egun ikuskatzaile kopurua nahikoa ete dan lurralde osoan kontrol eraginkorra bermatzeko.
Bere erantzunean, Pérez Ezquerrak iragarri dau bere Sailak 2026ko aurrekontuetan ikuskaritzako laugarren plaza tekniko bat sartzea eskatu dauela espedienteen tramitazinoa indartzeko. Ganera, VTCak ikuskatzeko berariazko protokolo bat sortu eta banatu dala azpimarratu dau, eta Ertzaintzari eta Bizkaiko udaletako udaltzaingoei bialdu jakela, errepideko eta uri barruko jarduketarako erespideak bateratzeko. Amaitzeko, diputatu andreak berretsi egin dau Aldundiak operadore guztiek “baldintza berberetan” eta ordenamentu juridikoa zorrotz betez lehiatzeko dauen konpromisoa.
BIDEBERDEAK-EN AURRERAPEN-DOKUMENTUA
Berak eskatuta, saio berean, Foru diputatuak Bizkaiko Ibilbide Berdeen Lurralde Plan Sektorialaren (Bideberdeak) aurrerapen dokumentuaren barri emon deutse Batzar Nagusietako taldeei. Tresna estrategiko horren helburua ibilbide zatikatuak uri eta landa eremuak lotuko dituan 1.325 kilometroko lurralde sare kohesionau bihurtzea da, mobikortasun aktiboa lurraldeko natura- eta kultura-ondareagaz integrauz. Ibilbide horreetan, erispide tekniko bateratuak erabiliz, erabilten ez diran trenbideak, abelbideak, bide naturalak, bidezidorrak eta ibilbide kultural eta ekologikoak bateratuko dira.
Diputatu andreak “funtsezkotzat” jo dau dokumentu hori hobetzeko parte-hartze publikoko prozesua. Prozesu hori martiaren 9an hasi da, dokumentua Aldundiaren webgunean argitaratuta, eta 2026ko bagilaren 8an amaituko da. Helburua tokiko ezagutzea integretea eta proiektuaren zilegitasuna indartzea da, hiru mailen bidez: jente aurreko informazinoa, kontsulta instituzionala eta herritarren parte-hartze aktiboa.
Aurreikusitako egutegiaren barruan, eskualdeetan eta Bilbon apirilaren 13tik 23ra bitartean egingo diran lurralde eztabaidarako zortzi tailer nabarmentzen dira. Modu berean, “geoerreferentziatutako” inkesta publiko bat gaituko da apirilaren 9tik maiatzaren 10era, herritarrek euren proposamenak zuzenean mapan adierazi daiezan. Ekarpenen azterketa teknikoaren ostean, emaitzak maiatzaren 10etik bagilaren 8ra bitartean aurkeztuko dira, behin betiko dokumentua hobetzeko, plan handiak “lurraldeagaz batera eregiten dirala” dinon premisapean.
Plana amaitzeko hurrengo pausuak hasierako dokumentua egitea, dokumentu hori onartzea eta, gero, behin-behineko dokumentua onestea eta behin betiko dokumentua ontzat emotea izango dira.
GORLIZKO OSPITALERAKO ZERBITZUA
Bizkaiko Talde Popularrak metroaren eta Gorlizko ospitalearen arteko Bizkaibuseko konexinoaren ganeko erreklamazinoei buruz galdetu deutsonean Garraioak, Mugikortasuna eta Turismoa Sustatzeko foru diputatuak argitu dau A3499 Plentzia-Gorliz lineak 20 minutuz behingo maiztasuneko estaldurea dauela, egunean joaneko 48 zerbitzu eta itzulerako beste 48, hain zuzen be. Diputatu andreak zehaztu dauenez, zerbitzu hori ez da metroarentzat beren-beregi diseinautako “anezka” zerbitzua, trenen ordutegiakaz koordinetan ahalegintzen dan linea “independentea” baino, bere fidagarritasuna ibilgailuen trafikoaren aldagaien araberakoa dan arren.
Pérez Ezquerrak jakinarazo dauenez, erreklamazino horreek –sailak ez dauka horreen barri ofizialik– joan dan zezeilaren 17an, aurretik korrespondentzia denporetan egon leitekezan desorekak konponduz zerbitzua Metro Bilbaoren martxako taula barrietara egokitzeko ordutegiak berregokitu ziralako izan daitekez, zerbitzuak minutu bi aurreratu ziran-eta.
