ERREKLAMAZINOEN BATZORDEAK HERRITARREK INFORMAZINO PUBLIKOA ESKURATZEKO DAUKIEZAN GAIZTASUNEN INGURUKO BEDERATZI ESPEDIENTE EBATZI EBAZAN IGAZ
- 2016an sortu zan organu independente horretako arduradunek 2024ko Jarduera Memoria aurkeztu dabe Bizkaiko Batzar Nagusietan; bertan ikusten danez, igaz Aldundiak 95 informazino eskari jaso ebazan, eta horreetatik 76 onartu ziran.
(Bilbon, 2025eko zezeilaren 20an). Bizkaiko Gardentasunaren Arloko Erreklamazinoen Batzordea Batzar Nagusietara etorri da gaur, 2024. urteari jagokon jarduerearen Memoriaren barri emoteko. Urteko txostenean ikusten danez, organu independente horrek, aurretik foru sailen bati eskatutako informazino publikoa eskuratzeko gaiztasunak zirala eta herritarrek aurkeztutako 9 erreklamazino ebatzi ebazan igaz. Memoria Iraskunde, Gobernamentu On eta Gardentasunerako Batzordean aurkeztu dabe organu horren egungo hiru titularrek: María Eugenia Matek (Presidentea), Nerea Garciak (Batzordekidea) eta Unai Aberasturik (Idazkaria).
2016an sortutako erakunde independenteak Batzar Nagusietako taldeei jakinarazo deutsenez, batzordeak 2023ko abenduan jasotako erreklamazino bi eta 2024an erregistrautako zazpi jaso eta ebatzi ebazan igaz. Organuak ia guztietan emon eutsan errazoia demandea jarri eban personeari, bakarra ezetsi eban-eta. Erreklamazino Batzordeak hamahiru espediente ebatzi ebazan 2022an, bederatzi 2023an eta zazpi 2024an, eta ez eban administrazinoagazko auzi-errekursorik jaso.
Batzordearen eretxiz, memoriatik ateraten diran zenbakiek bilakaera “positiboa” erakusten dabe, bai herritarrek aurkeztuta Aldundira heldu ziran informazino eskaeren hazkundearengaitik (95), bai organu horrek jasotako erreklamazino kopuruaren murrizketarengaitik (7).
Sailen arabera, eta memorian jasoten danez, aztertutako bederatzi erreklamazinoetatik hiru Herri Administrazio eta Erakunde Harremanetarako Sailaren jarduketen ingurukoak izan ziran; bik Azpiegituretarako eta Lurralde Garapenerako sailagaz eben zerikusia; eta beste bik Enplegu, Gizarte Kohesio eta Berdintasunerako sailagaz. Bukatzeko, Foru Aldundiko Ingurune Naturala eta Nekazaritza Sustatzeko Sailak eta Gizarte Ekintza Sailak erreklamazino bana erregistrau eben.
Ganera, eta emondako informazinoaren arabera, 2024an informazino publikoa eskuratzeko 95 eskaera erregistrau ziran. Hori modu “positiboan” interpretau da, izan be, herritarrek informazinoa eskatzeko bideak hobeto ezagutzen dituela erakusten dau, 2022an 71 eskaera izan ziralako, eta 2023an 64.
Oraingo honetan, eta beste urte batzuetan ez bezela, oposizinoko taldeek datuen irakurketa “positiboa” egin dabe, ñabardura batzukaz. Eneritz Madariaga Talde Berezia-Elkarrekin Bizkaia taldeko bozeroaleak “eskasia” ikusi dau, Bizkaiko populazinoaren pisua eta Foru gobernuaren garrantzia kontuan izanda, baina bere eretxiz, “apurka-apurka” herritarrek “gehiago ezagutzen ditue” Foru administrazinoak informazino publiko jakin batera heltzeko eskura jarten dituan tresnak. Modu berean, “positibo” ikusten ditu eskaeren gorakadak, ezetsitako erreklamazinoen jatsierak eta informazino hori lortzeko erreklamazino bidearen eraginkortasuna.
Raquel González Bizkaiko Talde Popularreko bozeroalea, bere aldetik, igaz Erreklamazinoen Batzordetik urten ziran personei eta une honetan taldearen buru diranei eskerrak emotera mugatu da.
Beste alde batetik, EH Bilduk, Aitor Lopez batzordekidearen bitartez, ontzat emon dau Batzar Nagusietako taldeek informazino-memoria euki izana saioa egin aurretik, “hori ez dalako beste batzorde batzuetan gertatzen”. Txostenak erakusten dituan zifrei jagokenez, Ingurune Naturala eta Nekazaritza Sustatzeko sailean erreklamazinoen kopuruak gora egin dauela eta aurkeztutako 95 eskaeretatik Foru gobernuak 78 onartu dirala azpimarratu dau.
Foru gobernuari eusten deutsien Batzar Nagusietako taldeek, Goyo Zurro bozeroale sozialistak adierazo dauenez, batzordearen informazinoa eta lan “zorrotza eta ekidadezkoa” eskertu ditue, eta azpimarratu dau jasotako informazino eskaeren kopurua handitu egin dala, erreklamazinoen kopuruak behera egin dauela eta ez dagoala administrazinoagazko auzi errekursorik.
Ildo berean, Celia Gómez jeltzaleak organu horren tratamentu “arduratsua eta zorrotza” azpimarratu dau. Datuetan ikusten danez, Aldundiak herritarren informazinorako sarbidea “zaintzen” dau. Gomezek “bikaintasunerantz eta zero erreklamazinoetarantz” egin beharreko bidean Foru gobernua erakusten ari dan “jarraitutasuna” azpimarratu dau. Datuek erakusten dabenez, “ez gagoz oso urrun”, esan dau.
MAHAIKIDEAREN HAUTAKETEA
Bestalde, Aitor Lopez izentau dabe Iraskunde, Gobernamentu On eta Gardentasunerako Batzordearen Mahaiko lehendakariorde. Bere izena 15 boto-orrietatik 4tan egon da. Ganerakoak hutsik egon dira.
