ZUGAZTIETAKO ABELTZAINEK HOBEKUNTZAK ESKATU DITUE GOLF ZELAIAREN ITXITURAN, CAMPILLOKO ERREPIDEAN ETA PEÑAS NEGRASEKO EKOETXEAN
- Hiru abeltzain Bizkaiko Batzar Nagusietara etorri dira, bide segurtasun faltea, Meaztegi zelaiko hesian dagozan hutsuneak eta Peñas Negraseko interpretazino zentroaren jarduerarik eza dirala-eta erakundeen bitartekaritzea eskatzeko.
- Eskaeretarako eta Herritarrakazko Hartu-Emonetarako Batzordean bertan, ELA sindikatuko ordezkariek, azkenengo hamarkadan Iberdrolan soldaten % 16ko murrizketea egon dala salatu dabe, eta egoera horrek PFEZaren diru-bilketan jatsierea eragin dauela foru kutxetan.
(Bilbon, 2026ko urtarrilaren 14an). Zugaztietako hiru abeltzainek Campillo inguruan bazketan daben animalien segurtasuna hobetzeko Meaztegi Golfen eta Aldundiaren arteko bitartekaritzea eskatu deutsee Batzar Nagusietako taldeei Bizkaiko Batzar Nagusietako Eskaeretarako eta Herritarrakazko Hartu-Emonetarako Batzordean. Agerraldian, “preminazko” hainbat eskari aurkeztu ditue inguruko funtsezko azpiegituretan mantenimendu faltak eragindako gatazkak konpontzeko. Abereen eta auzotarren segurtasuna bermatzera bideratutako eskaerak hiru eremutan zentretan dira: Meaztegi golf zelaiko hesia, BI-757 errepidearen segurtasuna eta Peñas Negraseko Ekoetxearen zerbitzuak.
José Antonio Quintana Linaza abeltzainak, lehenengo eta behin, Meaztegi golf zelaiko hesiaren egoera kritikoa salatu dau, Karmenetako larreagaz mugakide dan lekuan. Gaur egungo itxiturea, egoitza-sare moetakoa, “ez da nahikoa” abeltzaintzako jarduerarako, eta horren ondorioz, animaliak kirol-esparrura sartzen dira, ez dabelako erresistentzia fisikorik topetan. Egoera hori dala-eta, zelaiaren zuzendaritzak abeltzainen kontrako salaketak jarri ditu. Taldeak eskatzen dau Foru Aldundiak edo zentroko zuzendaritzak arantzazko hesolak eta alanbrea izango dituan abeltzaintzako itxitura egokia egin daiela, profesionalen babesbakotasuna eta animalientzako arriskua saihesteko.
Beste alde batetik, Quintanak Campillo eta Zugaztieta lotzen dituan bidean esku-hartze integrala egitea eskatu dau, segurtasunik ez dauelako eta gauez argiztapena falta dalako, animaliak harrapetea eta zirkulazino-istripuak eragin dituen faktoreak, hain zuzen be. Abeltzainek kritikau egin dabe helburu horretara bideratutako funts publikoak (20.000 euro) batez be tarte mugatuetan larregizko seinaleztapenean inbertidu dirala, zoladura arazoak eta zebrabiderik eza konpondu beharrean. Modu berean, bide hori gauez legez kanpoko lasterketetarako eta maniobra arriskutsuak egiteko erabilten dala salatu dabe, eta horrek komunidadearen atsedena kaltetzen dauela.
Eta, azkenik, bertaratuek Peñas Negraseko Ekoetxea hobetzeko eskaria egin dabe. Peñas Negraseko Ingurumen Interpretazinorako Zentroan zerbitzuak barriro aktibetea eskatu dabe; izan be, gaur egun zentroko tabernea itxita dago eta instalazinoak neguan asteburuetan bakarrik zabaltzen dira. Eskaera espezifikoenetako bat, Eusko Jaurlaritzaren esku dagoan Ihobe soziedade publikoari zuzendua, kanpoan ur-hartune bat prestetea da, erabilgarri dagoan iturri bakarra hesitutako esparruaren barruan dago-eta, eta erabiltzaileak hesiaren ganetik salto egitera behartuta dagoz, ura hartu gura badabe. Ganera, beste elementu batzuk instaletako eskatzen da, umeek olgetako guneak, besteak beste, inguruaren abandonu-egoerea arintzeko.
IBERDROLAKO LAN EGOEREA
Bizkaiko Batzar Nagusietako Eskaeretarako eta Herritarrakazko Hartu-Emonetarako Batzordean bertan, ELA sindikatuko ordezkariek agerraldia egin dabe, Iberdrolako beharginen lan egoerea salatzeko. Sindikatuko bozeroaleen berbetan, plantillak % 16ko galerea metatu dau erosteko ahalmenean 2015etik, izan be, aldi horretan hitzarmeneko soldata igoerak urtean % 0,7 “eskasera” mugatu dira. Oraingo negoziazinorako, enpresak % 2ko igoerea proponidu dau, eta zenbateko hori % 3 ingurukoa dan Kontsumoko Prezioen Indizearen (KPI) azpitik dago.
Soldaten debaluazino horrek eragin “zuzena” dauka Bizkaiko Ogasunean. Sindikatuak jakinarazo dauenez, PFEZaren bidezko zerga-bilketea beharginen diru-sarreren galeragazko proportzinoan murriztu da, eta horrek lurralde osorako baliabide publikoen murrizketea dakar.
Zuzendaritzak uko egin deutso erosteko ahalmenari eutsiko deutson akordioa lortzeari, eta kolektiboak mobilizazino-egutegiari ekin deutso. Aurreko greba eguneko “arrakastearen” ostean, manifestazinoa deitu da Bilbon zapatu honetarako, urtarrilaren 20rako aurreikusita dagozan negoziazinoei barriro ekin aurretik.
ELAk soldaten igoera txikia kritikau dau, konpainiaren 2025-2028 Plan Estrategikoak irabazi garbia % 47 handitzea (18.639 milioitik 27.400 milioira pasetea) eta akzinodunaren ordainsaria % 65 igotea (12.142 milioitik 20.000 milioira) aurreikusten dauen arren. Sindikatuetako ordezkariek “sumingarritzat” jo dabe beharginek sortutako aberastasuna euren lan baldintzetara ez transmitidutea, batez be enpresearen emaitzak “ondo baino hobeto” doazala kontuan izanda.
