ELORRIOKO INSTITUTUKO HAINBAT IKASLEK GERNIKAKO BATZAR ETXEA BISITAU DABE

• Ana Otadui Biteri Bizkaiko Batzar Nagusietako lehendakariak DBHko 4. mailako berrogeta hamar ikasle inguru hartu ditu gaur eguerdian foru parlamentuaren egoitzan.

(Gernikan, 2022ko bagilaren 15ean). Elorrioko Institutuko DBHko 4. mailako ikasleak Gernikako Batzar Etxera joan dira gaur goizean, bertako irakasleakaz, gune historiko, politiko eta sinboliko garrantzitsua ezagutzeko. Ana Otadui Biteri Bizkaiko Batzar Nagusietako lehendakariak harrera egin deutse ikasleei, eta Batzar Nagusien eginkizun nagusiak azaldu deutsez, gizaldietan zehar Bizkaiko herritarren ordezkariak batu diran lekuan bertan. Ikasleak hezkuntza-proiektu baten barruan apirilean Gerediagako (Abadiño) Batzar Etxea ezagutzen joan ziranean hartutako konpromisoa da.

Erakunde honetan hartzen diran erabagien garrantziari buruzko azalpenen ostean, ikasleek Bizkaiko Batzar Nagusien funtzionamentuari buruzko beste gai interesgarri batzuetan sakondu ahal izan dabe Otaduigaz, Erdi Arotik Durangoko Merindadeko ordezkarien topalekua izan dan Gerediagako Batzar Etxearen historia ezagutzeko bisitaldian be egin eben moduan. Bisitaldiari esker, Bizkaiko erakunde-egituraren ahalik eta konposizinorik hurbilena eta osoena jaso ahal izan dabe gazteek, baita Gernikako Batzar Etxeko lekurik enblematikoenetan argazkiak atera be, Beiratearen Aretoan, Osoko Bilkuren Aretoan eta Gernikako gaur egungo Arbolaren eta Zugatz Zaharraren enborraren ondoan, besteak beste.