Barneko informazino-sistemea

Ongi etorri Bizkaiko Batzar Nagusien barneko informazio-sistemearen (BIS) webgunera.

Hemen BIS sistemeari buruz jakin behar dozun guztia azalduko deutsugu:

  • zer dan eta zertarako balio dauen,

  • zelan aurkeztu komunikazino bat eta horren jarraipena zelan egin,

  • zure eskubideak zeintzuk diran.

Zer da BIS?

Barneko informazino-sistema bat da. Sistema honi esker pertsonek aukerea daukie Bizkaiko Batzar Nagusiak erakundeagaz daben lan- edo lanbide-arloko hartu-emonen ondorioz ezagutzen dituen irregulartasunen barri emoteko. Sistemeak gertakariak ikertzeko aukerea emoten dau, informatzailea babesteko bermeagaz.

BISen bitartez, Bizkaiko Batzar Nagusiek konpromisoa hartzen dabe Europako Parlamentuaren eta Kontseiluaren 2019ko urriaren 23ko 2019/1937 (EB) Zuzentarauagaz eta otsailaren 20ko 2/2023 Legeagaz (aurrerantzean, IBL). Lege hori arau-urratzeei eta ustelkeriaren aurkako arau-hausteei buruzko informazinoa emoten daben pertsonak babesteari buruzkoa da.

BISen oinarriak honeek dira:

  • Printzipioak:

    • Sistemea langileen artean zabaltzea.

    • Konfidentzialtasuna bermatzea eta salatzaileen aurkako errepresaliak debekatzea.

    • Salaketea izapidetzeko bermea.

    • Datu pertsonalen tratamendua babestea eta datu horreen kontserbazinoa aldi baterako mugatzea.

  • Arduraduna: BISen organo arduraduna kide anitzeko organoa izango da, eta erakundeko legelari nagusiak, aholkulari ekonomikoak eta aholkulari juridikoak osatuko dabe.

  • Kanala: elektronikoa izango da, erakundearen webgunearen bitartez.

  • Prozedurea: hartutako informazinoak jaso, izapidetu eta ebazteko orduan informazinoen kudeaketeak babes-, konfidentzialtasun-, objektibotasun- eta eraginkortasun-betebeharrei erantzuten deutse.

  • Sistema informatikoa: diseinutik bertatik dago konfiguratuta informazinoa segurua eta konfidentziala dala bermatzeko, eta informatzaileek euren kasuaren jarraipena egiterakoan anonimotasuna izan daien.

Bizkaiko Batzar Nagusien jarduketan izandako arau-hausteen barri emon zeinke BISren bidez:

  • Arau-hauste penal eta administratibo larriena eta oso larriena (Espainiako legeriaren barruan eta, edozelan be, Ogasun Publikoa edo Gizarte Segurantza urratzen dabenak).

  • Europar Batasuneko legediaren aurkako ekintzakaitiko arau-hausteena, baldin eta Batasunaren finantza-interesei eragiten badeutse edo Batasunaren barne-merkatuan eragiten badabe (EB 2019/1937 Zuzentarauaren eranskinean jasotako egintzak).

Jasotako informazino guztiak prozedurearen arabera tratatuko dira, zorroztasunez, objektibotasunez eta konfidentzialtasunez.

Bizkaiko Batzar Nagusiakaz lan- edo lanbide-arloko hartu-emonen bat eukiteagaitik erakundearen barruan gertatutako ustezko irregulartasunei buruzko informazinoa dabenak.

Horreen barruan sartzen dira:

  • Bizkaiko Batzar Nagusietako langileak.
  • Besteren konturako langileak.
  • Langile autonomoak.
  • Boluntarioak, bekadunak eta praktiketako langileak.
  • Bizkaiko Batzar Nagusien kontratistentzat, azpikontratistentzat eta hornitzaileentzat lan egiten daben pertsonak.

  1. Komunikazinoa aurkeztea. Informatzaileak irregulartasunaren barri ezarritako kanal elektronikoen bidez emon ahal izango dau, bere burua identifikatuz edo modu anonimoan.

  2. Komunikazinoa berrestea. Gehienez be 7 eguneko epean, informatzaileak informazinoa sisteman behar bezala erregistratu dala adierazten dauen hartu-agiria jasoko dau.

  3. Kasuaren jarraipena. Informatzaileak bere kasuaren egoerea kontsultatu ahal izango dau webguneko gune pribatu eta anonimo baten, komunikazinoari alta emotean jasoten dauen gakoa eta pasahitza erabiliz.

  4. Komunikazinorako sarbidea eta komunikazinoa onartzea. Jasotako informazinoa eskuratzeko aukerea barneko informazio-sistemearen organo arduradunak (BISA) baino ez dau. Sistemea kudeatzeko arduradunak informazinoa ez onartzeko arrazoirik dagoan aztertuko dau; delitu-zantzurik ikusten badau, zuzenean bidaliko dau Fiskaltzara.

  5. Ikerketearen hasierea. Informazinoa onartzen bada, BISA gertakariak ikertzen hasiko da. Prozesuak informatzailearen konfidentzialtasuna eta nortasunaren babesa bermatuko ditu.

  6. Informazinoa egiaztatzea eta zabaltzea. Ikerketeak irauten dauen bitartean beharrezko jarduketak egingo dira informatutako egitateak egiazkoak dirala baieztatzeko. Jasotako jatorrizko informazinoa zabaltzeko ahalegina egingo da eragindako pertsonek emondako beste informazino gehigarriakaz (datuak, agiriak…). Pertsona horreek ezin izango dabe inoiz informatzailearen nortasuna ezagutu.

  7. Ikerketearen epeak. Prozesuak gehienez 3 hilabete iraungo dau, informazinoa jasotzen danetik zenbatuta. 6 hilabetera arte luzatu ahal izango da kasuaren konplexutasunak halan eskatzen badau. Amaitzeko aurreikusitako data informatzaileari eta eragindako pertsonari jakinaraziko jake.

  8. Ikerketearen amaierea. Ikerketeari amaiera emoten deutsan ondorioen azken txostenak honako honeek zehaztuko edo eragingo ditu:

    • Espedientea artxibatzea. Irregulartasuna benetakoa dan ebidentziarik ez badago.
    • Jarduteko proposamena. Halan bajagoko, zehapen-espedientea edegiteko eskumena dauen organoari bialduko jako.
    • Fiskaltzara bidaltzea, delitu-zantzurik ikusten bada.

    Informatzaileak eta eraginpekoak jakinarazpena jasoko dabe, txostenaren emaitzagaz eta prozesuaren amaiereagaz batera.

BISen organo arduraduna kide anitzeko organoa izango da, eta erakundeko legelari nagusiak, aholkulari ekonomikoak eta aholkulari juridikoak osatuko dabe; modu autonomoan eta independentean funtzionatuko dau, eta Bizkaiko Batzar Nagusietako Mahaiak izendatuko dau

Ustezko arau-hauste baten informatzailea bazara:

  • Irregulartasun-susmoen barri emon ahal izango dozu, zure datuak emonez edo modu anonimoan. Baina horretarako beharrezkoa da:

    • Irregulartasuna Bizkaiko Batzar Nagusiakaz izandako lan- eta lanbide-arloko hartu-emon baten testuinguruan ezagutu izana.

    • Fede onez jokatzea; legearen edo interes orokorraren aurkako interes faltsu barik; horrela jokatzeak zigorra ekarri leike.

  • Helarazten deuskuzun informazino guztia konfidentzialtasun osoz tratatuko dogu. Legez baimendutako pertsonek bakarrik ezagutu ahal izango ditue zure nortasunari buruzko datu guztiak. Informazinoak eragindako pertsonek ez ditue, ezelan be, datu horreek ezagutuko.

  • Ustezko arau-hauste baten barri emoteak ezin izango deutsu errepresaliarik ekarri. Ez zuri, ez zugaz zerikusia dauen inori. Informatzailea Babesteko Legearen IV. tituluak (arau-hauste administratibo larriei, oso larriei, penalei edo Europar Batasuneko Zuzenbidekoei aplikatzekoak) berariazko babes- eta laguntza-neurriakaz bermatzen dau eskubide hori.

  • Emon deuskuzun informazinoa agintaritza judizial batek eskatzen badau, idatziz jakinarazoko deutsugu, salbu eta horrek ikerketea edo prozedura judiziala arriskuan jarri balei.

Komunikazioak eragindako pertsonek eskubide honeek izango ditue:

  • Errugabetasun-presuntzinoa.
  • Euren burua defendatzea eta espedienterako irispidea (Informatzailea Babesteko Legeak ezartzen dauenagaz bat).
  • Konfidentzialtasuna (euren identitate, gertakari eta prozeduraren datuakazkoa)..

BIS lehentasunezko bidea da administrazinoko, zigor-arloko edo Europar Batasuneko zuzenbideko arau-hauste larri edo oso larrien barri emoteko.

Halanda be, Informatzailea Babesteko Agintaritza Independentearen kanpoko kanalaren bidez be jakinaraz o zeinkez, zuzenean edo gure barne-kanalen bidez informazinoa emon ondoren.

Zelan emon neike informazinoa?

Informazioa emoteko gaitutako kanaletako baten sartu aurretik, eta informazinoari jagokonez gauzak ahaztea edo zehaztasun-faltak saihesteko, ahalik eta datu gehien biltzea gomendatzen deutsugu.

Datu horreek zenbat eta zehatzagoak izan, orduan eta errazagoa izango jaku informazinoa izapidetzea eta, halan bajagoko, ikertzea.

Gertatutakoari buruz emon daitekezan datuak:

  • Lekua, eguna eta ordua.
  • Eragindako pertsona edo pertsonak (ustez arau-haustea egin dabenak).
  • Bertaratutako pertsona edo pertsonak, balizko lekukoak izan leitekezanak.
  • Gertaeren deskribapen zehatza.
  • Gertatutakoari lotutako ebidentziak.

Informazinoa bialdu ondoren informazio gehiago emon nahi badozu, jarraipen-arloaren bidez jakinarazo zeinkigu (ikusi beherago).

Behera joan gehiago ikusteko

Internet bidez: kanal elektronikoa

Informazinoa era elektronikoan emoteko, webgunean dagoan formularioa erabili behar dozu. Pantailan hainbat eremu agertzen dira, beharrezko datuakaz osatu daizuzan.

Ganera, froga edo dokumentu gehigarriren bat badozu, fitxategiak erantsi ahal izango dituzu. Aldi baterako desgaituta. Metadatuen ezabapenean lan egiten dihardugu. Ordura arte, zure konfidentzialtasuna eta anonimotasuna bermatzeko, aukera hori desgaitu egin dogu.

Aurrez aurreko hitzordua be eskatu zeinke.

Formularioa bete eta igorri ondoren, erregistroa berretsiko dogu. Sartzeko gako bat bialduko deutsugu, gugaz hartu-emonetan jarteko eta izapideen jarraipena egiteko. Gorde gako hori, modu anonimoan informatu badozu, ezingo da-eta berreskuratu.

Beste daturen bat eskatu behar badeuskuzu, orduan be erabiliko dogu kanal hau.

Jakinarazpena egitea

Jarraipen-arloa

Gune hau jasotako komunikazino bakotxerako webgunearen atal pribatu eta anonimoa da. Sartu ahal izateko, segurtasunez iristeko emon deutsuguzan sarbide-gakoak behar dituzu.

Atal honen bidez honako honeek egin zeinkez:

  • Zure kasuaren izapidetze-egoerea kontsultatu.
  • Gugaz komunikatu.

Jarraipen-orrialderako sarbidea

Datu pertsonalen babesa eta konfidentzialtasuna

Bizkaiko Batzar Nagusietako Mahaia, BIS sortzeko organo arduraduna den aldetik, datu pertsonalen tratamenduaren arduraduna da. Bere barneko informazio-sistema kudeatzeko beharrezkoak diren datu pertsonalak tratatuko ditu, otsailaren 20ko 2/2023 Legean, ustelkeriaren aurkako eta arauzko arau-hausteei buruzko informazioa ematen duten pertsonen babesa arautzen duen Legean, ezarritako bermeen arabera, eta Segurtasun Eskema Nazionala arautzen duen maiatzaren 3ko 311/2022 Errege Dekretuaren II. eranskineko segurtasun-neurriak aplikatuz.

Informazio gehiago

Ohiko galderak

Segurtasuna eta konfidentzialtasuna dirala-eta, ezin da gakoa berreskuratu. Beraz, beste komunikazino bat bialdu beharko deuskuzu gertatutakoa azaltzeko, gai bera dala jakin daigun. Horrela sarbide-gako barri bat lortuko dozu, eta guk barruan zure aurreko komunikazinoagazko erreferentzia egingo dogu.

Zure komunikazinoa aztertu ondoren jarraitu beharreko bidea zein izango dan jakinarazoko deutsugu. Ikerketa bat hasten bada aurreikusitako amaiera-data jakinarazoko deutsugu. Epe hori gehienez 3 hilabetekoa izango da, zure jakinarazpenetik zenbatzen hasita, edo 6 hilabetekoa, ikerketea konplexua bada. Ikerketea amaitzerakoan emaitza jasoko dozu.

Izan be, zure informazinoak aukerea emoten deuskulako Bizkaiko Batzar Nagusien integritate- eta betetze-helburuen aurkako edozein jokabide igarteko eta ezabatzeko.

EZ. Informazioa bialtzeko inoiz ez jatzu eskatuko identifikatzeko. Modu anonimoan egin zeinke, eta zure datuak emotea erabagiten badozu, horreek sistemearen kudeatzaileek baino ez ditue ezagutuko, eta informazino hori ez jake ezetara be eragindako pertsoneari edo pertsonei emongo.

BAI. Komunikazino bat egiteagaitik errepresaliarik jasan badozu, arau-hauste administratibo oso larria izan leiteke Informatzailea Babesteko Legearen arabera, eta, beraz, salaketea jarri zeinke, bai gure barne-kanalen bidez, bai zuzenean Agintaritza Independentearen kanpo-kanalaren bidez (ikus kanpoko kanalari buruzko informazinoa webgunean).

2/2023 Legea betez, behar dan eta neurrizko denboran.

  • Datuak ikerketea hastea erabagi arte gordeko dira.

  • Datuak ezabatu egingo dira egiazkoak ez dirala egiaztatzen bada.

  • Datuak ezabatu egingo dira jakinarazpena egin eta 3 hilabete igaro ondoren ikerketea hasten ez bada. Anonimizatuta mantendu ahal izango dira, sistemearen funtzionamenduaren ebidentzia jasota ixteko.

  • Egiazkotasunik eza delitu penala bada, prozedura judizialak irauten dauen bitartean gordeko dira.

  • Datuak ez dira inoiz 10 urte baino gehiago gordeko.

Bialtzen dituzun datuetara honako honeek bakarrik iritsi ahal izango dira:

  • BISen arduraduna.
  • Datuak babesteko ordezkaria.
  • Giza Baliabideen arduraduna (jakinarazotako gertakariei buruzko diziplina-neurriak hartzeko beharrezkoa bada).
  • Zerbitzu juridikoen arduraduna (jakinarazotako gertakariei buruzko legezko neurriak hartu behar badira).

Ikerketeak beste organo batzuetako pertsonakaz informazinoa partekatzea eskatzen badau, modu konfidentzialean egingo da (anonimotasunaren edo pseudoanonimotasunaren bidez). Ezetara be ezin izango da informatzailea identifikatu.

Ikerketea egiteko beharrezkoak diranak baino ez. Prozedurarako garrantzitsuak ez diran datuak ezabatu egingo dira.

Bizkaiko Batzar Nagusien Barne Informazio Sistemaren bidez informazio-komunikazioak aurkeztu eta tramitatu daitezke. Komunikazioak honelakoak izan daitezke:

  • Anonimoak: komunikazio hauetan ez dira inon agertzen informatzailearen izena eta datu pertsonalak (2/2023 Legea, 33.7 art.).

  • Identifikatiboak: Informazioa ematen duen pertsonak bere datu pertsonalak adierazten ditu, hain zuzen ere izena, abizenak, nortasun agiriaren zenbakia eta helbide elektronikoa. Pertsona informatzaileak honako eskubide hauek dauzka:

    • Bere izenaren berri hirugarrenei ez jakinarazteko eskubidea (2/2023 Legea, 33.1 art.). Lege horren arabera ahal den kasuetan baino ez da jakinaraziko.

    • Bere datu pertsonalen tratamenduan datuen babesaren eta informazioaren segurtasunaren arloetako arau hauetan ezartzen dena betetzeko eskubidea:

      • Europar Batasunaren Datuen Babesaren Erregelamendu Orokorra (DBEO), 2016/679, Europako Parlamentuaren eta Kontseiluarena, 2016ko apirilaren 27koa

      • 3/2018 Lege Organikoa, abenduaren 5ekoa, Datu pertsonalak babestu eta eskubide digitalak bermatzeari buruzkoa.

      • 7/2021 Lege Organikoa, maiatzaren 26koa, arau-hauste penalak prebenitzeko, detektatzeko, ikertzeko eta epaitzeko eta zehapen penalak betearazteko tratatzen diren datu pertsonalak babesteari buruzkoa.

      • 2/2023 Legea, otsailaren 20koa, arau-hausteei eta ustelkeriaren aurkako borrokari buruzko informazioa ematen duten pertsonak babesteko dena.

      • 311/2022 Errege Dekretua, maiatzaren 3koa, Segurtasunaren Eskema Nazionala arautzen duena.

    • Datu pertsonalen babesaren inguruko eskubideak erabiltzeko eskubidea (DBEO, 15 - 22 art.).

    • Datuen babesaren inguruko informazioa jasotzeko eskubidea (DBEO, 13. eta 14. art.).

      Hona informazioa:

      • Tratamenduaren arduradunaren izena eta harremanetarako datuak.

      • Datuak babesteko ordezkariaren harremanetarako datuak.

      • Datu pertsonalak zertarako erabiliko diren eta horretarako oinarri juridikoak.

      • Datu pertsonalen hartzaileen kategoriak, egonez gero.

      • Noiz arte gordeko diren datu pertsonalak, edo, ezinezkoa denean, aldi hori ezartzeko erabiliko diren irizpideak.

      • Interesdunek eskubidea dutela tratamenduaren arduradunari eskatzeko datu pertsonalak eskuratzeko baimena, bai eta datuen babesari buruzko araudian ezartzen diren beste eskubide batzuk ere.

      • Kontrol-agintaritza baten aurrean erreklamazioa aurkezteko eskubidea dagoela.

      • Datu pertsonalak zer kategoriatakoak (motak) diren.

      • Datu pertsonalen sorburuak.

Interesdunek datuak babesteko eskubideak erabili ahal dituzte datuen tratamenduaren arabera (DBEO, 15 - 22 art.). Komunikazioan aipatzen den pertsonak datuen tratamenduaren aurka egin nahi badu (DBEO, 21. art.), lehentasuna edukiko du datu pertsonalen tratamenduak, kontrako frogarik egon ezean.

Datuak babesteko eskubideak erabiltzeko, interesdunek idazkia bidali beharko diete Bizkaiko Batzar Nagusietako Zerbitzu Teknikoei edo, bestela, 39/2015 Lergean zehaztutako gainerako tokietan ere aurkez dezakete idazkia.

Interesdunak Datuak Babesteko Euskal Bulegoan erreklamazioa egiteko eskubidea ere badu.

Bizkaiko Batzar Nagusiek Barne Informazio Sistema kudeatzeko behar dituzten datu pertsonalak tratatuko dituzte. Horretarako, arau hauek edukiko dituzte kontuan:

  • 2016/679 (EB) Erregelamendua, Europako Parlamentuaren eta Kontseiluarena, 2016ko apirilaren 27koa (DBEO).

  • 3/2018 Lege Organikoa, abenduaren 5ekoa, Datu pertsonalen babesari eta eskubide digitalen bermeari buruzkoa (DBEDBLO).

  • 7/2021 Lege Organikoa, maiatzaren 26koa, arau-hauste penalak prebenitzeko, detektatzeko, ikertzeko eta epaitzeko eta zehapen penalak betearazteko tratatzen diren datu pertsonalak babesteari buruzkoa.

  • 311/2022 Errege Dekretua, maiatzaren 3koa, Segurtasunaren Eskema Nazionala arautzen (ENS) duena.

  • 2/2023 Legea, otsailaren 20koa, arau-hausteei eta ustelkeriaren aurkako borrokari buruzko informazioa ematen duten pertsonak babesteko dena (hemendik aurrera, IBL); VI. titulua.

Jasotzen diren komunikazioak kudeatzeko ez dago kategoria bereziko datu pertsonalik tratatu beharrik (DBEO, 9.1 art.). Horregatik, datu pertsonalak kategoria berezikoak izanez gero, tratamendua:

  • Beharrezkotzat jotzen ez bada: datu pertsonalak berehala ezabatuko dira, eta ez dira erregistratuko ez tratatuko.

  • Beharrezkotzat jotzen bada: horretarako, DBEOren 9.2 artikuluaren g) letran ezartzen dena gertatu behar da, hau da, tratamendua beharrezkoa izan behar da funtsezko interes publikokoengatik, Batasuneko edo estatu kideetako zuzenbidean oinarrituta. Interesa honelakoa izan behar da:

    • helburuaren proportziozkoa

    • datuak babesteko eskubidearen funtsa errespetatu behar da

    • berariazko neurri egokiak ezarri behar dira pertsona interesdunaren interesak eta oinarrizko eskubideak babesteko.

Bizkaiko Batzar Nagusietako Mahaiak dauka Barne Informazio Sistema abian jartzeko ardura, bai eta datu pertsonalen tratamenduaren ardura ere.

Bizkaiko Batzar Nagusietako Mahaiak Barne Informazio Sistema abian jartzeko ardura, bai eta datuen tratamenduaren ardura ere. Hori dela-eta, Barne Informazio Sistemaren ardura daukan organoari (BISOA) esleitzen dio Barne Informazio Sistemaren ardura.

BISAOk egiteko hauek dauzka: datuak babesteko eskubideak erabiltzeko eskaerak kudeatzea eta ebaztea, eta alegazioak aurkeztea Datuak Babesteko Euskal Bulegoan segurtasun-urratzeak egon daitezkeenean eta salaketak aurkezten direnean. Horrela, interesdunen eskaeren kudeaketa eta kontroleko agintaritza eta erakundeekiko komunikazioak azkartuko dira.

Datuak eskuratzea:

Barne Informazio Sistemako datuak honako hauek baino ezin dituzte eskuratu:

  • SIIren organo arduraduneko (BISOA) pertsonek eta organo horrek barne informazio sistema kudeatzeko ahalmena eta ikerketa-espedienteak izapidetzeko ahalmena eskuordetzen dizkion pertsonak.

  • Bizkaiko Batzar Nagusien datuak babesteko ordezkariak.

  • Giza baliabideen arduradunak, baina Bizkaiko Batzar Nagusien enplegatu baten kontrako diziplina-neurriren bat ezarri behar denean soilik.

  • Legelari Nagusiak, komunikazioan adierazitako gertaeren inguruan lege-neurririk ezarri behar izanez gero.

  • Kasu bakoitzean datuen tratamendurako izendatutako arduradunek.

Barne informazio sistemaren aplikazioan jasotzen diren informazioen eta haien inguruko ikerketen erregistro-liburua dago (IBLn ezartzen diren baldintzak betetzeko). Liburu hori ez da publikoa. Liburu horretako erregistro bat edo erregistro baten atal bat honako kasu honetan baino ezin izango da eskuratu: prozedura judizial batean, agintaritza judizial eskudunaren zaintzapean, agintaritza horren autoa dela bide.

Komunikazio batean datu pertsonalak badaude, hura aurkezten duenak eskubidea dauka nor den hirugarren pertsonei ez jakinarazteko. 2/2023 Legeak baimentzen duen kasuetan baino ezin da aditzera eman nor den informatzailea (2/2023 Legea, otsailaren 20koa, arau-hausteei eta ustelkeriaren aurkako borrokari buruzko informazioa ematen duten pertsonak babesteko dena).

Datuen komunikazioa:

Barne Informazio Sistemako datu pertsonalak hirugarrenei eman ahal izango zaizkie Bizkaiko Batzar Nagusietan neurri zuzentzaileak ezartzeko edo zehapen-prozedurak edo zigor-prozedurak izapidetzeko beharrezkoa denean.

Barne informazio sistemak komunikazio anonimoak aurkezteko aukera eman behar du.

Informatzaileak nor den aditzera ematen badu, horren berri agintaritza judizialari, Fiskaltzari edo administrazio-agintaritza eskudunari bakarrik eman ahal izango zaie zigor-ikerketa, diziplina-ikerketa edo zehapen-ikerketa baterako. Horrelakoetan, informatzaileak ematen dituen datu guztiak babestuko dira arauetan ezartzen den bezala.

Informatzailea nor den inori adierazi aurretik berari azalduko zaio zer egingo den, baldin eta horrela ikerketa edo prozedura judiziala arriskuan jartzen ez bada. Agintaritza eskudunak idazki baten bidez azalduko dio zergatik ematen diren aditzera datu konfidentzialak.

Datu pertsonalak behar den zentzuzko aldian gordeko dira, 2/2023 Legean ezartzen dena betetzeko.

  • Datu pertsonalak ikerketa hastea erabaki arte gordeko dira.

  • Komunikaziotik 3 hilabete igaro ondoren ikerketa hasi ez bada, datuak ezabatuko dira.. Sistemaren funtzionamendurako beharrezkoa denean baino ez dira gordeko. Kasu oso konplexuetan, datuak 3 hilabete gehiago gorde ahal izango dira gehienez.

  • Kasu hauetan datuak ezabatuko dira:

    • Ikerketarako beharrezkoak ez badira. Ikerketarako tratatuko ez diren kategoria bereziko datuak ere bai.

    • Jakinarazten den jokabidea IBLn aipatzen ez bada.

    • Frogatzen bada ez direla egiazkoak.

      Datuak egiazkoak ez izatea delitu penala bada; horrelakoetan, datuak prozedura judizialak irauten duen bitartean gordeko dira.

  • Jasotako informazioen eta barneko ikerketen erregistro-liburuko datuak ezin dira gorde 10 urte baino luzeago.

Bizkaiko Batzar Nagusiek Segurtasunaren Eskema Nazionala arautzen duen maiatzaren 3ko 311/2022 Errege Dekretuaren II. eranskineko segurtasun-neurriak aplikatzen dituzte.

Bizkaiko Batzar Nagusiek, datuen tratamenduaren arduraduna diren aldetik, datu pertsonalen tratamenduari ekin aurretik datuen babesaren gaineko eraginaren ebaluazioa (DBEE) egin dute (DBEO, 35. art.). Izan ere, datu pertsonalen tratamenduak arriskuan ipini ahal ditu pertsona interesdunen eskubideak eta askatasunak.

DBEEaren bidez:

  • Aztertu ahal izan da datuen tratamenduen segurtasunerako bermeak eta neurriak egokiak diren Barne Informazio Sistema kudeatzeko, eta sendotu ahal izan dira.

  • Baliagarri dauden neurri teknikoekin eta antolaketa-neurriekin estali ezin den arriskuari aurre egin ahal izan zaio, Barne Informazio Sistema onetsi ahal izateko, DBEOren 35. artikuluan ezartzen denarekin bat etorriz eta IBLren bigarren xedapen iragankorreko 3 hilabeteko epealdia betetzeko.

DBEEa honela egin da:

  • Tratamenduaren eragiketak eta xedeak deskribatu dira: pertsonen eta egingo diren eragiketen datuak eta identifikatzaileak, barne Informazio sisteman bilduko direnak, aztertu dira.

  • Datuak eta identifikatzaileak tratatzeko eragiketak beharrezkoak eta xedeen proportziozkoak direnez aztertu da.

  • Tratamendu-eragiketek interesdunentzat sortzen dituzten arriskuak identifikatuko dira, eta arrisku horiek ezabatzeko neurriak eta bermeak ezarriko dira, honako hauek batez ere: arriskuak izenordeen bitartez minimizatzea (DBEO, 25.2 art.) eta datuak zifratzea, beharrezkoa izanez gero (DBEO, 3.1 art.). Horrez gainera, datuak babesteko araudian (DBEO eta DBEDBLO) eta aplikatu beharreko sektoreko araudian ezartzen diren gainerako betebeharrak ere beteko dira.