Gizarte Ekintzako foru sailak GUFEn enplegu eskaintza barriak deitzea eta lan poltsak sortzea "bultzauko" dau
Isabel Sánchez Robles Gizarte Ekintzako foru diputatu andrea Batzar Nagusien aurrera etorri da gaur, EH Bildu eta PP taldeek eskatuta, Gizarte Urgazpenerako Foru Erakundeko (GUFE) kontratazinoen gaineko azalpenak emoteko eta, batez be, Eskaeratarako eta Herritarrakazko Hartu-emonetarako Batzordean bertako behargin batek, aurkeztu ebazan “kexen” aurrean erantzuteko. Batzorde horretan, behargin horrek, 2006ko azkenengo OPEan bizi izandako esperientzia azaldu eban Batzarretako taldeen aurrean. Testuinguru horretan, pertsona nagusiak zaintzeko 881 beharginez osatutako lan taldea eta 10 egoitza dituan erakunde publiko horretako presidente ere badan diputatuak konpromisoa hartu dau, “OPE barrien deialdia bultzatzeko eta lan poltsa barriak sortzeko” erakunde autonomo horretan.
Horrez gain, Sánchez Roblesek aldeei –zuzendaritzari eta sindikauei–, beharginen kontratazinoari jagokonez “etorkizunean jarraitu beharreko operatibea definiduko dauen akordioa arin lortzeko” eskatu deutse. Holan, Gizarte Ekintzako sailak “GUFEko lan poltsen berrantolakuntzea bultzatuko dau, deialdi publiko barrien bitartez, eta baita poltsak barriztatzeko erispideen negoziazinoa be”, adierazo dau.
Konpromiso hori, Bizkaiko Batzar Nagusietako Gizarte Ekintzako batzordean erakutsi dau gaur goizean. Bertara, EH Bilduk eta Bizkaiko Talde Popularrak, bakotxak bere aldetik, egindako eskari bi dirala eta joan da. Talde horreek Batzarren aurrera joateko eskaria egin dabe, GUFEko aldi baterako kontratazinoen gaineko azalpenak emoteko eta, batez be, maiatzaren 13an egin zan Eskaeratarako eta Herritarrakazko Hartu-emonetarako Batzordean erakunde horretako behargin batek, 2006ko OPEan hauteman ebazan “irregulartasun posibleen” gaineko salaketen aurreko azalpenak emoteko.
Batzarretako talde biek gogoratu dabenez, behargina Arartekoaren txosten bigaz heldu zan Bizkaiko Batzarretara. Txosten horreetan, Arartekoaren bulegoak aholkua emoten deutso Aldundiari, GUFEko lan poltsen erregulazino barria egin daian eta, hori onartzen zan bitartean, erakunde horren barruan “goragoko eginbeharretan” aldi baterako plazea eskuratzeko aukerea izatea eskatu eban beharginari konponbidea emoteko konbidapena egiten jakon Foru erakundeari.
Diputatu andreak adierazo dauenez, Arartekoaren bulegoaren gomendioei jarraituz, 2015eko abenduan, “goragoko eginbeharren izaerea eta esanahia barriro negoziau beharra ezarri da, legeagaz eta bardintasun, meritu, gaitasun eta konkurrentzia libre printzipioakaz bat etorrita”, esan dau.
Diputatu andreak azaldu dauenez, GUFEko azkenengo deialdia 2006koa izan zan, horren gaineko ebazpena urte bi geroago emon zan arren. 2011tik aurrera ezinezkoa izan da beharginak kontratetako prozesu barririk hastea, Gobernu zentralak “debekau” egin dauelako enplegu publiko deialdiak egitea. Debekualdi hori aurton altxatu da gizarte zerbitzuetako beharrak betetea bideratutako baliabideei jagokenez.
"DISFUNZINO PUNTUALAK"
Aitatutako behargin horren kasu zehatzari jagokonez, Sánchez Roblesek autortu dauenez, horren barri Batzar Nagusietan aurkeztu eban salaketaren bitartez izan dau, eta ez berak ez GUFEko gerenteak ez eben zuzeneko informazinorik jaso salaketea aurkeztu dauen pertsonaren aldetik. Enpresak bere unean erakutsi eban ezezko eretxia, salaketea aurkeztu dauen pertsonak garai haretan, lortu gura eban lanpostuak eskatzen eban hizkuntz eskakizuna “ez ebalako” beteten izan zan.
Ezelan be ez dira “irregulartasunak”, oposizinoko talde batzuek eta salaketea aurkeztu dauen beharginak berak esan daben moduan, GUFEko kontrol eta jarraipenerako batzordean gertautako “disfuntzino puntualak” baino. Sindikatuen eta zuzendaritzaren ordezkaritza “parekidea” dauen organo horrek erakunde publiko horretako lan poltsek behar dan moduan funtzionetea kontroletan dau, eta hori da arazoa konpondu behar izan zan lekua, Roblesek esan dauenez.
Aldeek adostu dabena kontuan izanda, organo horren betebeharren artean dagoz, “kontratazinoen jarraipena egitea; aldi baterako poltsako kideen aldetik kontratazinoen aurrean aurkezten diran helegiteak aztertzea eta ebazpenak proponidutea; poltsatan aurreikusten ez diran kasuen aurreko ebazpenak eta arautegiaren aurreko aldaketak proponidutea; poltsen funtzionamenduan egon daitekezan disfunzino posibleak zuzentzeko formulak proponidutea, pertsonengan eragin gitxiago izateko; eta poltsen beharrak aztertzea eta poltsa barriak proponidutea”.
Bukatzeko, diputatu andreak GUFEk bizi dauen “gatazka” maila “txikia” azpimarratu dau. “48.126 kontratazinoko” bolumenagaz, 2011 eta 2015 artean “8 demanda” baino ez ziran aurkeztu, horreetako bost izaera sozialekoak eta hiru auzibidezkoak. Horreetako bat gaurko saioan landu dan kasuagaz dago erlazionauta. Salaketea jarri dauen pertsonea be aretoan egon da.
