OGASUNAK "KANPOKO 218 AGENTE" IZANGO DITU, APIRILAREN 4AN HASIKO DAN 2021EKO ERRENTA-KANPAINAKO TELEFONO BIDEZKO ARRETEA OSATZEKO

• Elkarrekin Bizkaiak eskatuta, hurrengo kanpainako telefono bidezko eta aurrez aurreko arreta emongo daben beharginen sareko xehetasunak jakinarazo ditu Elixabete Etxanobe Landajuela Herri Administrazio eta Erakunde Harremanetarako foru diputatuak Bizkaiko Batzar Nagusietan

(Bilbon, 2022ko martiaren 24an). Aldundiak apirilaren 4an hasiko dan Errentaren kanpainea bermeakaz egin ahal izateko beharginen kontratazinoaren ganeko xehetasunak emon ditu gaur. Zehatzago, Elkarrekin Bizkaiak eskatuta, Elixabete Etxanobe Landajuela Herri Administrazio eta Erakunde Harremanetarako foru diputatuak agerraldia egin dau Bizkaiko Batzar Nagusietan, eta azaldu dau Zugaztel foru enpresearen bidez “kanpoko 218 agente” kontratau beharko dirala, errentaren kanpainako telefono bidezko arretea indartzeko. Guztira 311 persona izango dira. Ogasun eta Finantza Sailak eskatuta, beste “67” personak bat egingo dabe aurrez aurreko arretea emoteaz arduratzen dan taldeagaz.

Etxanobek gogorarazo dau apirilaren 4an hasiko dala 2021eko Errenta kanpainea, eta Ogasunak hiru kanal ezarri dituala (aurrez aurrekoa, telefono bidezkoa eta digitala) zergadunek kudeaketak egin eta aitorpena aurkeztu ahal izateko. Herritarrek bagilaren 30era arteko epea izango dabe Bizkaiko osasunagaz dituen betebeharrak beteteko.

Aurrez aurreko arretarako, Aldundiak ia dozena bat bulego izango ditu Bizkaian: Ogasunaren beraren instalazinoak eta 10 Gertu bulego. Bitarteko “126” funtzionario, aurreko kanpainan baino “53 gehiago”, zerbitzu hori aurrez aurre eskaintzeaz arduratuko dira, aldez aurretik hitzordua eskatuta, astelehenetik barikura, 08:30etik 19:00etara.

Telefono bidezko laguntza, guztira, “311 lagunek” beteko dabe, hau da, 2021ean baino “20 gehiagok”. Talde hori SIACeko eta Aldundiko bertako beharginek, Zugazteleko behargin finkoek eta zerbitzuak emoteko kontratautako kanpoko enpresa batek osatuko dabe. 218 personaz osatutako talde estra horrek –111 lagunek errepikau egingo dabe igaztik– lehen mailako deiei erantzungo deutse, errazago erantzun ahal izango diran deiei hain zuzen be. “Konsulta gehien-gehienak” holangoak izango dira.

Ogasunaren kalkuluak kontuan izanda, “600.000 laguni” emon ahal izango jake arretea telefonoz, egunean “10.000 kontsulta” inguru. Telefono bidezko arretarako azken talde horretako beharginak kanpoko enpresa batek aukeratuko ditu, Zugaztelen enkarguz. Profilak, PFEZ eta arretako arloko hainbat trebetasun izan beharko ditu. Talde horri hilebeteko beren beregiko prestakuntza emon jako, “ordainduta”.

Azken kontratazino hori kritikau egin dabe Elkarrekin Bizkaiak eta EH Bilduk. Prestakuntza horreetarako, kontratazino-modalitate hori “tamalgarria” da, “laneko baldintzak ez diralako izango Aldundiaren beraren lan-boltsatik datozanen bardinak”. Etxanoberen eretxiz, barriz, bertako eta kanpoko giza baliabideen arteko “orekea” gorde gura da, 3 hilebetez “oso zerbitzu puntuala eta maila altukoa” emon gura dalako. “Zugaztelen kontratuak eskaera horri erantzuteko aukera emoten deusku”, esan dau.

ALBAITARIEN IZENDAPENA

Bestalde, Aldundiak, igaz Abeltzaintza Zerbitzuko beste hainbeste albaitari-plaza beteteko hautaketa-prozesu baten hautatuak izan ziran hiru personak izendatzea erabagi dau, igazko amaieran Aldundiak berak izendapen hori geldiarazo eban arren, lanpostuetako batean “irregulartasunak” egon eitekezalakoan eginbide judizialak edegi zirala jakin zalako, ESK sindikatuak salaketea jarri ostean.

Elkarrekin Bizkaiak egindako galderari erantzunez, Etxanobek jakinarazo dau, “kautelazko” lehenengo erabagia hartu zanetik hiru hilebete igaro diranean, orain, “ez dagoala atzerapen gehiagorako errazoirik”, hiru personei egindako kaltea dala eta, batez be aurreko lana itxi eban horreetako bati. Kalte hori 12 hilebete inguru luzatu leiteke. Esan dauenez, “galera ekonomikoak, egin bako kotizazinoak edo antxinatasuna galtzea” jasaten ari dira. Ganera, geldiarazote horrek kalte ekonomikoa eragin deikeo Aldundiari berari. “Zuhurtziak aurrera jarraitu behar eban justiziak erabagia hartu arte”, erantzun dau Eneritz de Madariaga talde moreko bozeroaleak.

SAREB ETA ETXEBIZITZA PUBLIKOA

Beste alde batetik, Iraskunde, Gobernamentu On eta Gardentasunerako Batzordeak atzera bota dau EH Bilduren eta Elkarrekin Bizkaiaren erdibideko zuzenketa-eskea, Euzko Abertzaleak eta Euskal Sozialistak taldeen kontrako botoakaz, Espainiako Gobernuari lege-aldaketak egin daizala eta SAREBek Bizkaian dituan aktiboak lurraldeko udalen esku jarri daizala eskatzeko, udalek etxebizitzak kudeatu eta alokairu sozialeko etxebizitzen udal-parkera bideratu daiezan. Modu berean, Eneritz de Madariaga batzordekidearen berbetan daukiezan “67 lursailak” alokairu sozialeko etxebizitza publikoa eregiteko erabiltea eskatzen zan. Talde Berezia-PP Bizkaia taldea abstenidu egin da, proposamenean SAREBek dituan “8 etxebizitzak” Eusko Jaurlaritzak kudeatzea jasoten dalako.