Aurreko Albisteak

ALDUNDIAK 2022KO AURREKONTUEN PROIEKTUA ERREGISTRAU DAU BIZKAIKO BATZAR NAGUSIETAN, ETA HILEBETE BI IRAUNGO DAUEN TRAMITE PARLAMENTARIOA HASI DAU

  • Foru sail bakotxeko arduradunek azalduko ditue kontuak Ogasun eta Finantzetako Batzordean

  • Herritarrek hamar eguneko epea izango dabe Batzar Nagusietako webguneko “Herritarren Atariaren” bidez alegazinoak aurkezteko

(Bilbon, 2021ko urriaren 29an). Ana Otadui Biteri Bizkaiko Batzar Nagusietako Lehendakariak 2022ko Lurralde Historikoaren Aurrekontu Orokorren Foru Arau Proiektua jaso dau gaur goizean José María Iruarrizaga Artaraz Ogasun eta Finantzetako foru diputatuaren eskutik. Holan hasi da Bizkaiko Batzar Nagusietako tramitazinoa. Batzar Nagusien Bilboko administrazino-egoitzan kontu publikoak euskarri elektronikoan aurkezteko eta erregistretako ohiko irudiagaz, aurrekontuak onartzeko prozedurea hasiko da. Aurreikuspenak beteten badira, prozedurea hurrengo hilebete bietan burutuko da.

Batzar Nagusietako Mahaiak aurrekontuen proiektua onartu ostean, foru diputatuek euren sailen kontuak azaldu beharko ditue horretarako deitutako informazino-batzordeetan. Azaroko bigarren astean, sail bakotxeko arduradunak Ogasun eta Finantzetako Batzordera joango dira hurrengo urterako jarduketa-ildo nagusiak eta proiektuak zehaztera. Fase hori bat etorriko da herritarren alegazino-aldiagaz.

Herritar guztien parte hartzera edegiko dira barriro aurrekontuak, Batzar Nagusietako Araudiak jasoten dauen moduan. Datorren astean, Bizkaiko Batzar Nagusiek “jjggbizkaia.eus” webguneko “Herritarren Atarian” argitaratuko dabe aurrekontuen proiektu osoa, bizkaitarrek euren ikuspuntuak, iradokizunak eta aldaketak helarazoteko aukerea izan daien. Epea hamar egunez egongo da zabalik, zemendiaren 2tik 12era bitartean.

Aurrekontuen eztabaida prozesua urtea amaitu baino lehen bukatu daiten dago antolatuta. Horretarako, diputatuen agerraldien ostean, eta dokumentua herritarren alegazinoei zabaldu eta gero, Mahaiak, Batzar Nagusietako bost taldeek (Euzko Abertzaleak, EH Bildu, Euskal Sozialistak, Elkarrekin Bizkaia eta Talde Berezia-PP Bizkaia) 8.886,1 milioi euroko aurrekontuei zuzenketa-eskeak aurkezteko epea zabaldu beharko dau. Horreetatik 1.459,8 milioi Sailen esku egongo dira.

Zuzenketa-eskeen aldia itxi ondoren –seguruenez zemendiaren 30ean–, Batzar Nagusiek zuzenketa-eskeak aztertuko ditue, lehenengo osoko batzarrera deitu aurretik, osotasunezko zuzenketa-eskeak eztabaidatzeko. Osoko batzar hori, seguruenez, abenduaren 13an egingo da. Osoko horren ostean, hala bajagoko, zuzenketa-eske parzialak batzordean eztabaidatuko dira. Eta Batzar Nagusietako tramitea hilebete horren amaieran bukatuko litzateke -seguruenez abenduaren 30ean-, Ogasun eta Finantzetako Batzordetik igaro ostean geratzen diran zuzenketa-eske parzialak aztertuko dituan beste osoko batzar bategaz.