ENKARTERRIKO 1870-1975 ARKITEKTURA INBENTARIOAK MUGAK GAINDITU DITU, DOCOMOMON AINTZATESPENA JASO DAU ETA
17e hau
- Bizkaiko Batzar Nagusiek egindako azterlana joan dan abenduko DOCOMOMO IBÉRICO Boletinean agertu da, Mobimendu Modernoko arkitekturaren eta urigintzaren dokumentazinorako elementu garrantzitsu moduan.
“Azterlan-Inbentarioa: Enkarterriko Arkitektura Garaikidea (1870-1975)” lanak nazino eta nazinoarte mailako eraginaren garrantzitsua lortu dau, 2019ko abenduko “Docomomo Ibérico” Boletinean, Mobimendu Modernoko arkitekturaren eta urigintzaren dokumentazinoari eta kontserbazinoari jagokonez nabarmendu beharreko azterlan moduan aitatu da eta. “Docomomo Ibérico”, Mobimendu Modernoko urigintzaren eta arkitekturaren ganeko nazino eta nazinoarte mailako argitalpen ospetsuenetakoa da.
DOCOMOMOn (Documentation 4nd Conservation of Building, Sites 4nd Neighbourhoods of the Modern Movement), Mobimendu Modernoaren arkitektura ondarearen inbentarioa egiteko eta zabaltzeko eta babesteko helburuagaz 1990ean sortu zan nazinoarteko erakundean, egindako aitamenak, joan dan azaroaren 13an aurkeztu zan Bizkaiko Batzar Nagusien azterlanaren balioa autortzen dau.
Docomomo Ibérico fundazinoa Nazinoarteko Docomomoren ordezkaritzea da, 1994an sortu zan eta egoitzea Bartzelonan dauka. Bere helburua, arkitektura eta urigintza arloetako kontserbazinoaren helburu nagusiak Espainian eta Portugalen apliketea da. Fundazinoan ia Arkitektoen Elkargo guztiek hartzen dabe parte, eta baita herrialde bietan arkitektura ezagutuazoten behar egiten daben alkarteek be.
“Azterlan-Inbentarioa: Enkarterriko Arkitektura Garaikidea (1870-1975)”, Enkarterrietako Museoak bultzatutako lan zorrotza da. Museoa Bizkaiko Batzar Nagusien esku dago, eta azterlana Gorka Pérez de la Peña Oleaga historialariak egin dau.
Orain arte Bizkaian egin dan epealdi horretako arkitektura ondarearen bilduma nagusia da, eta Enkarterriko 20 udalerri jasoten ditu, eskualdea historiaren ikuspegitik ulertuta, Ezkerraldea eta Meatzaldea be barruan hartuta.
Azterlanak 1.500 eraikin inguru jasoten ditu. Horreetatik, 1.200 lehenengoz aztertu dira egitasmo honetan; ganerakoak, Portugaleteri, Sestaori eta Barakaldori buruzko monografietan daborduko aztertuta egozan eraikinak dira.
Azterlanean jasoten diran udalerriak Abanto-Zierbena, Alonsotegi, Artzentales, Balmaseda, Barakaldo, Galdames, Gordexola, Güeñes, Lanestosa, Muskiz, Karrantza, Ortuella, Portugalete, Santurtzi, Sestao, Sopuerta, Trapaga, Turtzioz, Zalla eta Zierbena dira. 20 udalerri horreetako bakotxak bere atala dauka, eta bertan aztertu diran eta eskualde horreetatik ibili ezkero ikusi daitekezan arkitekturako 11 estiloetan sailkatu diran eraikin guztiak aurkezten dira. Eraikin bakotxak bere fitxea dauka, datea, egilea, kokalekua eta arte eta ondare arloko azalpena jasoz.
Inbentarioa, gure arkitektura ondarea herritarrei hurreratzeko elementua da, eta baita euren uri-plangintzak egiteko edo ondarea zabaltzeko orduan erabili ahal izango daben erakundeentzako, udalentzako edo profesionalentzako lanerako tresnea be.
Inbentarioa Enkarterrietako Museoaren webgunean kontsultau daiteke, eta baita daborduko aitatu diran Portugaleteko, Sestaoko eta Barakaldoko monografien PDF bertsinoak be, esteka honetan:
https://enkarterrimuseoa.eus/home/publicaciones.asp
