BIZKAIKO BATZAR NAGUSIEN OSOKO BILKURAK OPOSIZIOKO TALDEEK AURREKONTUEI EGINDAKO OSOTASUNEZKO ZUZENKETEI UKO EGIN DIE

11dic hau

• Hurrengo astean batzordean aurrekontu proiektuari buruzko eztabaidarekin jarraituko dute EH Bildu, Elkarrekin Bizkaia eta Talde Berezia / PP Bizkaia taldeek aurkeztutako 630 zuzenketen bozketarekin.

• Gaur ere Gernikako Batzarretxean antolatutako ohiko Osoko Bilkuran, foru arauetako bestelako aldaketak eztabaidatu dira.

Batzordean jarraituko dute 2020. urterako Bizkaiko Aurrekontuen Foru Arauari buruz eztabaidatzen, Batzar Nagusien Osoko Bilkurak EH Bildu, Elkarrekin Bizkaia eta Talde Berezia / Bizkaiko Alderdi Popularra taldeek Osotasunezko Zuzenketei uko egin ondoren. Bozketa bakar batean, Foru Ganberak hiru ekimenak atzera bota ditu Euzko Abertzeleen eta Euskal Sozialisten aurkako 32 botorekin eta hiru talde sustatzaileen aldeko 14 botorekin.

José María Iruarrizagak, Ogasun eta Finantzen Sailburua, nabarmendu du aurrekontuek egunero 1,7 milioi euro emango dizkietela bizkaitarrei 2020. urtean, alegia; “Bizkaia egiten” goiburua nagusitu den urte batean.

Hitza hartu dutenen hurrenkeraren arabera, Amaya Fernández Talde Berezia / PP Bizkaia taldeko bozeramaileak aurrekontua “oso konformistatzat” jo du eta kritikatu du ez dagoela “Bizkaiak egoera ekonomiko latza gainditzeko” prest.

Ondoren, Eneritz De Madariagak (Elkarrekin Bizkaia) osotasunezko zuzenketa defendatu du, aurrekontuak “ez direlako feministak, ez dutelako klima larrialdiari aurre egiten, ez dutelako kalitatezko lana sortzearen alde egiten eta ez dituztelako hiritarren eskubideak blindatzen”.

EH Bildu taldearen ordez, Arantza Urkaregik deitoratu du aurrekontuek “Bizkaiko biztanle guztientzako bizi kalitate on bat bermatu ez izana”. Horrez gain, adierazi du ere lehentasunak “aberastasunen banaketa orekatsua, kalitatezko enpleguaren sustapena eta klima larrialdia prebenitzeko neurriak” izan beharko liratekeela.

Ekain Ricok (Euskal Sozialistak) oposizioko taldeen jarrera gaitzetsi du eta horiei aukerako proiekturik ez izatea leporatu die. “Aurrekontuen proiektu honek Bizkaiko biztanleek egunero aurre egin beharreko arazo zehatzetarako erantzun zehatzak eskaintzen ditu”, adierazi du Ricok.

Azkenik, Jon Andoni Atutxak (Euzko Abertzaleak), osotasunezko zuzenketen argudioak gezurtatu ondoren, zera ziurtatu du: “konformistak izango omen gara, baita fidatzekoak ere”. “Aldundi honek eta hura eusten duten taldeek pertsonen alde egin duten apustua irmoa da”, defendatu du.

Hurrengo izapideak

Osotasunezko zuzenketak atzera bota ondoren, talde desberdinek Ekonomia eta Ogasun Batzordean aurkeztutako 630 zuzenketa partzialak eztabaidatuko dira abenduaren 16, 17 eta 18an. EH Bildu taldeak bere 224 zuzenketak defendatuko ditu. Gauza bera egingo dute Elkarrekin Bizkaia taldeak, aurkeztutako 281 zuzenketa partzialekin, eta baita Talde Berezia / PP Bizkaia taldeak ere, planteatutako 122 aldaketekin.

Zuzenketak foru-departamentuka honela banatu dira: zuzenketa gehien Ekonomia Sustapeneko Sailak jaso ditu (105 zuzenketa); ondoren, hauek daude: Iraunkortasuna eta Ingurune Naturala (88 zuzenketa); Enplegua, Gizarteratzea eta Berdintasuna (85 zuzenketa); Herri Administrazioak eta Harreman Instituzionalak (77 zuzenketa); Euskara, Kultura eta Kirola (75 zuzenketa); Gizarte Ekintza (70 zuzenketa); Garraioa eta Mugikortasun Iraunkorra (42 zuzenketa); Azpiegiturak eta Lurralde Garapena (37 zuzenketa); Ogasuna eta Finantzak (29 zuzenketa); Laguntza Sozialeko Institutua (IFAS) (7 zuzenketa); eta Udal Finantzaketa (zuzenketa bat).

2020eko Aurrekontuen Proiektua parlamentu-izapidean aurkitzen da, Foru Ganberan, urriaren 31n erregistratu zenetik. Hurrengo urterako Bizkaiko Lurralde Historikoko Aurrekontu Orokorren proiektu hau 8.444,3 milioi eurotan da, eta 1.286,6 milioi foru sailei dagozkie.

630 zuzenketa partzialak Ekonomia eta Ogasun Batzordean eztabaidatu ondoren hurrengo astean, aurrekontuen izapidea abenduaren 27an antolatuko den Osoko Bilkura batekin amaituko da, batzordeak erreserbatutako zuzenketa partzialekin, eta, ondoren, 2020eko Bizkaiko Lurralde Historikoko aurrekontuak ontzat emango dira.

Foru arauen aldaketak

Osokotasunezko Osokoa amaitu ondoren, Ohiko Osoko Bilkura hasi da, non arauaren bi aldaketa eztabaidatu diren. Alde batetik, abenduaren 19ko Ogasun eta Finantzak Batzordean gehiengoak ontzat emandako erabakia berretsi da, 2019. urterako Bizkaiko Aurrekontu Orokorrei buruzko 8/2018 Foru Araua aldatzeari buruzkoa. Aldaketa horri esker, araudia Auzitegi Goreneko doktrinara egokitu daiteke eta 200 familiei baino gehiagoei PFEZko atxikipenak itzuli diezaieke, euren egunean bildutako amatasun eta aitatasun prestazioengatik.

Batzordean gertatu zen bezala, araua ontzat eman da Euskal Nazionalistak, Euskal Sozialistak eta Talde Berezia / PP Bizkaia taldeen laguntzarekin (guztira, 33 botorekin), EH Bildu eta Elkarrekin Podemos, berriz, abstenitu egin dira (14 boto).

Horrez gain, EH Bildu taldeak eskatuta, Foru Arauaren Proposamen bat eztabaidatu da, Bizkaiko Lurralde Historikoko Kontu Orokorrean, genero ikuspegia barne hartu duten programak sartzeari buruzkoa. Proposamena ontzat eman da, talde guztien aldeko 42 botoekin, Talde Berezia / PP Bizkaia taldekoa izan ezik, hura abstenitu baita.

Ana Otaduik, Bizkaiko Batzar Nagusietako Lehendakaria, bi osoko bilkurak amaitutzat eman ditu 12:10ean, eztabaidan hiru ordu baino gehiago eman ondoren.