Aurreko Albisteak

PP alderdiak Zugaztietako eskulturen parkearen egoereari buruz galdetzen dau

Meatzalde goikoa

Eskulturen parkea

Bilbon, 2014ko urtarrilaren 3an

Batzar Nagusietako Bizkaiko Talde Popularrak Josune Ariztondo Kulturako Foru Diputatu andrearen batzorderatzea eskatuta dauka datorren eguenean, urtarrilaren 9an, egingo dan Kultura eta Euskerako Batzordearen bilerarako, hain zuzen be argitu dagian Zugaztietan kokatutako “Meatzalde Goikoa parkeko eskultura batzuen itxikeria-egoerea, Aldundiaren lurretan dagoz-eta”. Talde Popularrekoek jakin gura dabe ia Aldundiak neurririk hartu dauen parkearen arduradunei eskatzeko mantenimendu egokia egiteko, dagoan moduan egoteak “arriskua” dakartsielako bisitariei. Ganera, beste ekimen baten bitartez, popularrek galdetzen dabe ia Bizkaiko beste lekuren batzuetan parke gehiago kokatzeko asmorik ete dagoan.

ZUGAZTIETAKO ELLACURÍA ETXEA

Batzordearen bilera berean Batzarkide-Taldeek PPren beste ekimen bati buruz bozkatu beharko dabe, Ellacuría etxea deritxan Zugaztietako (Trapagaran) Magdalena kaleko 1.eko eraikinaren iraupena bermatzeko Foru Aldundiak ofizioz jartuteari buruzko Arauz Besteko Proposamena dala-ta. Popularrek dinoe etxe hori “aurri aginean dagoala, Monumentu Multzoaren oinarrizko babes zerrendan egon arren.”

Etxe hori dala-ta, popularrek Kulturako Diputatu andrearen batzorderatzea eskatu dabe, ezagutzeko ia zer egin dauen Aldundiak Trapagaraneko Udalaren eskaerei erantzuteko eta Batzar Nagusiek eurek martiaren 7an onartutako Arauz Besteko Proposamen baten bidez eskaturakoari men egiteko, non esaten jakon “behar izango balitz, ofizioz jardunda” bermatu dagiala etxearen iraunerazpena.


UDONDOKO ZUBIA ETA KULTURA BONOA

Bilera horretan beste gai batzuk be aztertuko dira, esaterako Euskal Herriko industria ondarean dauen garrantziagaitik Udondoko zubia (Leioa, Bizkaia) Kultura Ondasun sailkatzeko, monumentu kategoriagaz, espedientea abierazo dagiala Eusko Jaurlaritzari eskatzeari buruz PP alderdiak aurkeztutako Arauz Besteko Proposamena. Antza danez, zubiaren egiturearen zati bat Bilboko Areatzan egoan Isabel II.aren zubiaren euskarriakaz egin zan, eta horrek egiten dau Espainian dagozanen artetik fundizinozko zubirik zaharrena izatea.

Beste alde batetik —hau be PP alderdiaren eskariz— Aldundiak argipideak emongo ditu Bizkaiko Kultur Txartela deritxan ekimenari buruz, liburuak, diskak eta filmak erosterakoan deskontuak lortzekoa. Kultura-bono hori sasoi ezbardin bitan izango da erabilgarri, bata abenduaren 16tik urtarrilaren 31ra arte eta bestea aurtengo martiaren 17tik maiatzaren 18ra arte.