Bizkaiko Batzar Nagusiek ekonomia bizibarritzeko erakundeen arteko akordioa berronetsi dabe

Gaur Bilbon alkartu dan Bizkaiko Batzar Nagusietako Erakundeen arteko Batzordeak, Eusko Jaurlaritzaren eta Bizkaiko, Arabako eta Gipuzkoako Foru Aldundien artean, 2013ko ekitaldian Euskadiko defizit marjina barriaren partekatutako erabileraren kontura ekonomia bizibarritzeko jarduketak eta inbertsino proiektuak aurrera eroateko sinatutako erakundeen arteko akordioa berronetsi dau. Akordioaren helburua, ekonomia bizibarritzeko eta enplegua sortzeko jarduketak eta inbertsino proiektuak martxan jartea da. Akordio horri esker, lau erakundeek konpromisoa hartu dabe, helburu horretara 180 milioi euro bideratzeko. Diru horren erdia Bizkaian inbertituko da, Eusko Jaurlaritzako aurrekontuetatik urtengo diran 63 milioi euroei eta Bizkaiko Foru Aldundiak jarriko dituan 27 milioi euroei esker.
Bizkaian egingo diran inbertsino garrantzitsuenak proiektu honeetara bideratuko dira: Bilboko Metroaren 3. lineara; Zamudioko Teknologia Elkartegia zabaltzera, aeronautika sektorerako Automatizazino Zentro Aurreratuaren eraikuntzagaz; Ur Partzuergoagaz eta URA agentziagaz batera garatu beharreko lan Hidraulikoetara; eta Gernikan Enpresa eta Barrikuntza zentro bat sortzera. Partiden beste parte bat trenbideko azpiegitura batzuetara, EuskoTrenentzat unidadeak erostera, arrantza azpiegituretara, merkataritzea, turismoa, nekazaritzea eta arrantzea sustetako programetara, Sestaon egingo dan etxebizitza sustapenera eta BIOEF proiektuaren, Barrikuntza eta Ikerketa Euskal Fundazinoaren, garapenera bideratuko da. Akordioaren aurkezpenean, Jose Luis Bilbaok, Bizkaiko Aldun Nagusiak, adierazo dau “hasiera-hasieratik argi genduala ze proiektutara bideratu behar zan dirua, eta Eusko Jaurlaritzagaz batera aurrera eroan beharreko proiektuak izan behar zirala”.
Erakundeen arteko akordioa Euzko Abertzaleak eta Bizkaiko Popularrak taldeen aldeko botoakaz eta EH Bildu eta Socialistas Vascos taldeen abstentzinoagaz berronetsi da. Azken talde bi horreek kritikau egin dabe inbertsinoen artean Ermuko saihesbideko beharrak hasteko partidarik ez egotea, Iñaki Egañaren, Socialistas Vascos taldeko bozeroalearen, ustez, bide azpiegitura hori “lehentasunezkoa” dalako. Aitor Torrek, EH Bilduko bozeroaleak, “lekuko garapen eta enpleguaren sustapen proiektuetara bideratutako inbertsinorik” ez dagoala azpimarratu dau.
Ermuko saihesbideari jagokonez, Jose Luis Bilbaok esan dau “2013an proiektuari hasierea emoteko partida bat sartzea oso ondo geratuko litzatekela politikaren ikuspuntutik, baina hori ardurabakotasunkeria izango litzatekela, obra osoa bukatuko dala bermatu ezin badogu”. Holan, adierazo dau 2014ko aurrekontuei buruzko eztabaida saioa “izango dala urte bat baino gehiagoko proiektu hori sartzea edo ez sartzea erabagiteko unea, proiektuaren lehenengo faseak lau urteko burutzapeneko epea eta 90 milioi euroko inbertsinoa daukalako”.
BIZKAIKO ARGIAK
Lan-saio berean, batzarretako taldeek, joan dan garagarrilaren 24an eskinitako omenaldian, terrorismoaren biktimei “Bizkaiko Argia” aintzatespena emoteari buruzko eztabaidea izan dabe. Talde Popularrak aurkeztu dau ekimena, eta Jose Luis Bilbaori aurpegiratu deutso “sari hori faltsutu egin dauela, frankismoak eragindakoak moduko beste biktima batzuk sartuz eta apirilaren 24ko osoko bilkureak emondako agindua bete barik itxiz”. Esther Martínez talde popularreko bozeroaleak, “ETAk Bizkaian hil dituan 204 pertsonak” gogoratu ditu, eta bere eretxiz, garagarrilaren bukaeran Foru Jauregian ospatutako ekitaldia “bidebakokeria eta terrorismoaren biktimen aurreko errespetu falta” izan zan.
Jose Luis Bilbaok adierazo dauenez “omenaldi ekitaldi inklusiboa, bateragarria, egin gura izan genduan, ETA, GAL, BVE taldeen eta talde parapolizialen biktimei eta baita frankistek fusilautako Aldundiko langileei gure aintatespena erakutsiz”. Ildo berari jarraituz, Lorea Bilbaok, Euzko Abertzaleak taldeko bozeroaleak, “EAJ-PNV-k beti erakutsi dauela giza eskubideen eta terrorismoaren biktima guztien aurreko konpromisoa” azpimarratu dau. Bere eretxiz, “penagarria, errazoi batzuk edo beste batzuk dirala eta, garagarrilaren 24ko ekitaldi haretan, talde politiko guztiak egon ez izana izan zan, biktimei eta euren senideei alkartasuna eta laguntzea erakutsiz”.
ETXE KALERATZEAK ETA AKORDIOAK
Foru Aldundiko arduradun nagusiak EH Bilduk egindako galderari be erantzun behar izan deutso. Talde horrek Aldun Nagusia batzordera etortea eskatu dau “Foru Aldundiko ordezkariek BBK erakundean, etxetik kaleratzeen gaian, aurrera eroaten dituen erespideak eta defendiduten dituen politikak zeintzuk diran argitu daian, Aldundia, gaur egun Kutxabankeko parte dan kutxaren sortzaileetakoa dan neurrian”. Jose Luis Bilbaoren eretxiz, “Kutxabank, errazoi bat edo beste dala eta, euren hipotekak ordaindu ezin dituen pertsonakaz akordio gehien lortzen dauen erakundea da”. Horrez gain, Irune Sotok, EH Bilduko ordezkariak, Bizkaian euren etxeetatik kaleratutako pertsonei buruz aurkeztu dituan zifrak ez dirala zuzenak esan dau.
Beste alde batetik, batzordeko taldeek, aldeko 10 botogaz eta EH Bilduren abstentzinoagaz, PP-k aurkeztutako Arau Proposamen bat onartu dabe, Bizkaiko Lurralde Mugaketei buruzko abenduaren 5eko 9/2012 Foru Araua aldatzeko, Bizkaiko armarrietan edo banderetan egiten diran aldaketak, “egin beharreko txosten heraldikoaren edo vexilologikoaren bitartez” egiaztautako errazioetan oinarrituko dirala bermatzeko. Horrez gain, EH Bilduren abstentzinoagaz, baita be, Aldundiari, Foru jakinarazpenetan QR kodeak sartu daizan eskaerea egiteko PP-ren beste proposamen bat be onartu da.
Bukatzeko, EH Bilduk aurkeztutako ekimen bi atzera bota dira. Lehenengoan, eskaerea egiten jakon Aldundiari, kontzertautako zerbitzuengaitik enpresei edo erakunde pribaduei (egoitzei, eguneko zentroei…) ordaintzen deutsien tarifatik, greba egunetan langileei ordaintzen ez jaken soldataren partea kendu daian. Bigarrena be ez da onartu, Euzko Abertzaleak eta Bizkaiko Popularrak taldeen kontrako botoakaz, eta bertan eskaerea egiten jakon Eusko Jaurlaritzari, ginekologia zerbitzua barriro martxan jarri daian Ondarroako, Lekeitioko eta Markinako osasun etxeetan, EH Bilduren eretxiz, “azken hilebeteetan zerbitzu horrek murrizketa larriak izan ditualako”.