Bizkaiko Batzar Nagusiek ez dabe onetsi Madrilgo Udalagazko alkartasuna eskatzeko Arauz Besteko Proposamena, bertako kontuak interbenidu dirala eta
Batzarretako Podemos Bizkaia taldeak Arauz Besteko Proposamena aurkeztu dau gaur goizean, Iraskunde, Gobernamentu On eta Gardentasunerako Batzordean, Foru erakundeak Madrilgo Udalagazko alkartasuna adierazo daian, Ogasun Ministerioak bertako kontuak interbenidu ostean. EH Bilduren zuzenketa eskea jaso dauen ekimenak Batzarretako gainerako taldeen kontrako eretxia jaso dau.
Proposamena aurkeztu dauen taldeak, joan dan urrian Ekonomia eta Ogasuneko Ministerioak Madrilgo Udaleko kontuak interbenidu ostean aurkeztu dau proposamena “PP taldeak tokiko autonomiaren eta Udalen legitimidade demokratikoaren kontra zelan jarduten dauen argi eta garbi erakusten dauen adibidea”. Asun Merinero batzordekideak defendidu dauenez, Estaduko beste edozein udalerriren kontrako erasoa bilakatu daike. Podemos Bizkaia taldearen Arauz Besteko Proposamenak zortzi puntu eukazan, eta EH Bilduk zuzenketa eskea aurkeztu dau. Joseba Gezuraga EH Bilduren ordezkariak proposamen “zehatzagoa” defendidu dau, Aurrekontuen Egonkortasunerako eta Finantzen Iraunkortasunerako Lege Organikoa indar barik iztea eskatuz. Zuzenketa-eske horretan, Madrilgo Udalagazko alkartasuna gainerako udalerri guztietara zabaltzen zan, euren aurrekontuetan finantzen superabita erakusten daben udaletara, batez be.
Aldundiko gobernua babesten daben taldeen aldetik, Ekain Rico Euskal Sozialistak taldeko bozeroaleak bere kontrako eretxia azaldu dau, bere esanetan “lupea ez dalako alkartasun eskari batean jarri behar, aztertu egin behar dan eta zuzena ez dan gastuen gaineko arau batean, baino”. Jesús Lekerikabeaskoa Euzko Abertzaleak taldearen ordezkariak, Madrilgo Udalari jagokon egoera jakin baten gainean bere eretxia ez emotea gurago izan dau, “gure ardurea Bizkaiko udalak diralako, eta guk geure etxeko lanak egin genduzalako eta bereizten gaituen Foru Araua daukagulako”. Javier Ruiz Talde Popularreko kideak adierazo dauenez, “administrazino publiko guztiek goragoko mailako instantzia baten tutoretzapean dagoz, baita Gobernu Zentrala be”, eta Madrilgo Gobernuak martxan jarri dauen aurrekontuen egonkortasunerako politikea goraipatu dau. Talde Mistoko Arturo Aldecoak hainbat gauza eskatu ditu: “zuhurtasuna, akordioak bilatzea eta onartzen dan guztia serioa eta iraunkorra izatea”.
AGERRALDI ESKARIA
Beste alde batetik, Batzarretako Iraskunde, Gobernamentu On eta Gardentasunerako Batzordeak Asier Larrucea Galdameseko alkate ohiaren agerraldi eskaria egitea onetsi dau. Ekimena Javier Ruiz Talde Popularreko kideak egin dau, alkate ohiak, bazkarien truke Aldundiaren obrak jasotearen inguruan egin ebazan adierazpenen gaineko interesa erakutsiz. Bere abstentzinoaren bitartez, Euzko Abertzaleak taldeak agerraldia eskatzea erraztu dau, baina esan dau Larrucea daborduko ez dala kargu hautetsia eta bere azalpenak, alkate izan zan udalerriko Udalbatzan emon beharko leukezala. Gainerako taldeak ados agertu dira Asier Larrucea Batzar Nagusien aurrera etorteko eskaria egiteagaz.
LH-KO PRAKTIKAK ALDUNDIAN EGITEKO AUKEREA
Goizeko saioa, Ibone Bengoetxea Herri Administrazio eta Erakunde Harremanetarako Foru Diputatu andrearen agerraldiagaz amaitu da. Eskaria Zigor Isuskiza EH Bildu taldeko batzordekideak egin dau, Lanbide Heziketako ikasleen praktikak Bizkaiko Foru Aldundian egiteko aukerearen gainean itaunduz. Bengoetxeak adierazo dauenez, Foru Aldundiak aspalditik ditu hitzarmenak sinatuta LHko ikastetxeakaz, ikasleen prestakuntza akademikoa eta laneratzea hobetzeko. Dana dala, adierazo dauenez, batzuetan ez dira beteten eskinitako plaza guztiak.
