FRANTZIAKO POITIERSEKO UNIBERSIDADE OSPETSUKO EHUN IKASLEK BAINO GEHIAGOK GERNIKAKO BATZAR ETXEA BISITAU DABE

 

• Ana Otadui Biteri Bizkaiko Batzar Nagusietako lehendakariak Poitierseko (Frantzia) Sciences Po Humanidade eta Gizarte Zientzien Unibersidadeko ikasle eta irakasleak hartu ditu Batzar Nagusietako egoitzan.

(Gernikan, 2023ko urtarrilaren 17an). Poitierseko (Frantzia) Sciences Po humanidade eta gizarte zientzien unibersidadeko ehun ikasle baino gehiago Gernikako Batzar Etxean izan dira gaur eberdian. Ana Otadui Biteri Bizkaiko Batzar Nagusietako lehendakariak harrerea egin deutse, eta eurakaz ibili da Batzar Nagusien egoitza erakusten. Euskal politikearen eta kulturearen leku adierazgarriak ezagutzeko proiektu baten barruan kokatu da bisitaldia.  

Euskadi ezagutzeko idea Akitania Berriko unibersidadeko arduradunak eurak bultzatu eben, eta euren ikasleek Europako sistema parlamentario zaharrenetakoaren historian eta ondarean sakontzeko interesa agertu eben. Frantziako unibersidade horrek kalidadeko prestakuntzea eskaintzen deutse etorkizunean Frantziako politikan eta diplomazian postu nabarmenak beteko dituen personei.

Frantziako unibersidadeak bidaia bat antolatzen dau urtero inguruko herrialdeetara, ikasleek hurbileko errealidade politikoak eta sozialak ezagutu daiezan. Otaduigaz izandako berbaldiaren ostean, unibersidade frantseseko 110 ikasleek hobeto ulertu ahal izan ditue Bizkaiko Batzar Nagusien gaur egungo antolamendua, funtzinonamentua eta eskumenak, historian zehar izan daben berezitasuna eta euskal politikan izan daben garrantzia ahaztu barik.