BIZKAIKO BATZAR NAGUSIEK PERSONA GOR ETA GOR-ITSUENTZAKO ZERBITZU IRISGARRIAGOAK EZARTEN AURRERA EGITEKO ESKATU DEUTSIE ALDUNDIARI
- Gizarte Ekintzako batzordeak ahozko komunikazinoa eta kolektiboaren gizarteratzea bermatzeko ekimena onetsi dau, neurria nahikoa ez dala uste dauen oposizinoaren aurrean.
- Batzorde berean egindako agerraldian, Gizarte Ekintzako diputatuak Bilboko Lersundi kaleko bulegoetan desgaitasun-azterketak egiteko baldintzak “egiaztetako eta balioztatzeko” lana egingo dala iragarri dau.
- Amaia Antxustegi Ziardak, modu berean, Sestaoko Albiz Santiago Llanos egoitzara bisitea egingo dauela adierazo dau, zerbitzuaren kalidadea eta emoten dan arretea zuzenean gainbegiratzeko, hainbat gabeziagaitik edegitako espedienteen ostean.
(Bilbon, 2026ko martiaren 2an). Bizkaiko Batzar Nagusietako Gizarte Ekintzako batzordeak Foru Aldundiko herritarren arretarako zerbitzu guztietan persona gorren, entzumen-desgaitasuna dabenen eta gor-itsuen ahozko komunikazinoa bermatzeko Arauz Besteko Proposamena onartu dau gaur. Euzko Abertzaleak eta Euskal Sozialistak taldeek batera aurkeztu daben ekimenak komunikazinorako oztopoak kentzea dau helburu, aukera bardintasuna eta gizarteratze osoa bermatzeko. Proposamenak oposizinoko hiru taldeen abstentzinoa jaso dau, “ez dalako nahikoa”.
Onetsi dan proposamenak jarduketarako funtsezko bost ardatz ezarten ditu: 2026an zeinu hizkuntzako bideo-interpretazinorako baliabideak apurka-apurka ezartea; daborduko existiduten dan interpretazino zerbitzua etenbarik bultzatzea eta hobetzea; foru beharginak prestetea eta sentsibilizetea, aurrez aurreko GERTU eta Gizarte Ekintza lako arreta zerbitzuak lehenetsiz; zerbitzuaren kalidadea ziurtatzeko bide teknologiko barriak aztertzea; eta Eusko Jaurlaritzagaz eta Hirugarren Sektoreagaz lankidetzan jardutea proiektu barritzaileetan, profil profesional barriak sartzeaz gain.
Eztabaidan, Berta Campo Prieto batzordekide sozialistak zerbitzu publikoetarako sarbidea bardintasunean emon behar dala defendidu dau, eskubideak “neurri zehatz eta errealista” bilakatuz, aniztasuna gehiago errespetetan dauen administrazinorako. Ziortza Álvarez Gandiagak (Euzko Abertzaleak), bere aldetik, kolektiboak modu autonomoan parte hartzea ahalbidetuko dauen “sistema egonkor, koherente eta egokituaren” beharra azpimarratu dau.
Halanda be, oposizinoa kritiko agertu da eta abstentzinoaren alde egin dau. Eneritz de Madariaga Martínek (Talde Berezia-Elkarrekin Bizkaia) proposamena “asmoen adierazpen hutsa” baino ez dala eta ez dala oso erabilgarria esan dau, bideo-interpretazinoak tramite konplexuetan beharrezkoa dan aurrez aurreko arretea ordezteko arriskua dagoala ohartarazoz. Raquel González Díez-Andinok (Bizkaiko Talde Popularra) adierazo dauenez, gor-itsuak “ia kanpoan” geratzen dira, eta ez dau ondo ikusten profil profesional barriak erabiltea zeinuen interpreteak ordezteko. Bukatzeko, Urtzi Ostolozaga Arrienek (EH Bildu) esan dau ekimena “oso motz” geratzen dala, eta zeinu hizkuntzako berezko zerbitzua eskatu dau, arretea “suertearen” menpe egon ez daiten.
DESGAITASUNA BALORETAKO INSTALAZINOEN EGOKITZAPENA
Amaia Antxustegi Ziarda Gizarte Ekintzako foru diputatua bere sailaren kudeaketearen inguruko hainbat gairi erantzuteko etorri da gaur batzorde berera. Horreetako batean, Bilboko Lersundi kaleko bulegoetan Médicos Bizkaia izenekoaren esku dagoan zerbitzuan desgaitasun azterketak egiteko baldintzak “egiaztetako eta balioztatzeko” lana atoan hasiko dala iragarri dau. Neurri hori joan dan urtarrilaren 27an erregistrautako kexa baten erantzun zuzen lez sortu da. Kexa horretan, Eneritz de Madariaga Martín Batzar Nagusietako Talde Berezia-Elkarrekin Bizkaiako bozeroaleak zehaztu dituen zentroak arkitektura eta komunikazino arloetan dituan hainbat gabezia salatzen ziran.
Diputatu andreak azpimarratu dauenez, erakundeak persona guztientzako sarbide “egokia eta ekitatiboa” bermatzeko hartu dauen konpromiso “sendoa” da, jasotako hobekuntza proposamenak “ahalik eta denpora laburrenean” martxan jarteko jorratuko dirala berretsiz. Oraingoz, kabina zabalagoa izango dauen igongailu barri bat instalauko da, irisgarritasuna hobetzeko.
Auditoretza tekniko hori egiteko, Gizarte Ekintza Sailak Hirugarren Sektoreko erakundeen lankidetza aktiboa izango dau. Azpimarratzekoa da Fekoorren parte-hartzea, irisgarritasuneko teknikarien bitartez, Apnabirena, balioztatze-zerbitzuaren bidez, eta ONCErena. Antxustegi Ziardak zehaztu dauenez, baterako ebaluazino horri esker, antzemandako akatsak zuzendu ahal izango dira 2026ko garagarrilean amaituko dan zerbitzuaren hurrengo lizitazinoari begira, kontratu barriak irisgarritasun unibersala ziurtatzeko beharrezkoak diran sistemak jasoko dituala bermatuz.
Hobekuntza horreek egiten diran bitartean, diputatu andreak gogorarazo dau sailak Uribitarte kaleko kokapen guztiz irisgarria –sarbidea kalean bertan dau– eskaintzen jarraitzen dauela, mobiduteko behar bereziak dituen personentzako alternatiba lez. Gogora ekarri dauenez, egoera jakin batzuetan balorazino batzuk online egin daitekez.
SESTAOKO ALBIZ SANTIAGO LLANOS ADINEKOEN EGOITZEAREN EGOEREA
Saio berean, diputatuak, EH Bilduk eskatuta, Sestaoko Albiz Santiago Llanos adinekoen egoitzearen egoerea azaldu dau, 2025ean hiru espediente edegi zirala baieztu eta gero. Espediente horreen ondorioz, Aldundiak “23.500 euroko” isuna jarri eutsen ratioak ez beteteagaitik eta senideei emondako arreta medikoarengaitik, Izaskun Duque batzordekideak gogorarazo dauenez. Arartekoari bialdutako beste kexa batek eragin dau gaia Bizkaiko Batzar Nagusietara itzultzea.
Gizarte Ekintzako diputatuak zehaztu dauenez, gai horren inguruan 2025eko zezeilean egin eban azkenengo agerraldiaren ostean, sailak arreta medikoagaz, medikazinoagaz eta garbitasunagaz erlazionautako senideen sei kexa gehiago bideratu ditu. Igazko urriaren 21ean egindako ofiziozko ikuskapen batean “akatsak” hauteman ziran instalazinoen mantentze-lanetan, baina gehienak zuzendu egin dira. Iragarri dauenez, ikuskapen horretan ez zan urraketarik edo ez-beteterik hauteman beharginen ratioei edo lotura fisikoen erabilerari jagokenez.
Bestalde, Antxustegi Ziardak baieztu dauenez, erakunde kudeatzaileak jarritako administrazinoagazko auzi-errekursoaren ondoriozko prozesu judiziala –aurreikusitako zehapen-ebazpenen kontrakoa– daborduko egin da, eta gaur egun epaiaren zain dago. Diputatu andreak gardentasunaren eta erabiltzaileen ongizatearen aldeko konpromisoa berretsi dau, euren kezkak egiaztetako egoiliarren familiakaz oraintsu hartu-emonak euki ostean, laster zentrora aurrez aurreko bisitea egingo dauela iragarriz, zerbitzuaren kalidadea eta emondako arretea zuzenean gainbegiratzeko.
